Rakhe World Tuberculosis Day ha Jowai, palat 675 ngut kiba wan shakhmat ban dih dawai ha rilum Jaintia

Syllad | The Rising MeghalayaMarch 24, 2022

Ka District Tuberculosis Control Society, West Jaintia Hills District kala rakhe iaka World Tuberculosis Day ha phyllaw ka jaka treikam jong ka ha Panaliar, Jowai.

Ka matpdeng jong ka World Tuberculosis Day kalong “Invest to end TB, Save Life”.

Ka jingrakhe ia kane ka sngi kyrpang jong ka jongpang TB ka hap hapoh ka National Tuberculosis Elimination Programme kaba ka thong jong ka long ban rat dyngkhong ia kane ka jingpang hapoh ak Ri India.

Ka Dr EBV Laloo District Tuberculosis Officer haba ai jingkren ka la ong, ka jingpang TB kadei kawei naki jait jingpang kaba tip kum ka silence killer kaba tang hapoh 3 minit ka lah ban pynïap arngut ki mynsiem briew lada ym shim khia ban sumar haka por kaba biang.

Ka la kyntu ba lada don kiba ïoh ïa kine ki dak ki shin wat kheiñ sting kloi lan leit sha ki jaka sumar ba jan tam bad phah test ïaka kyrkhah bad kumba long mynta ha TB centre ha Jowai la don  ruh ka CB-NAAT test bad ka Microscopic examination.

Ka la ïathuh baki nongpang TB bala wan sha ki jaka sumar ha u snem 2021 ha baroh ar ki District ka East bad West Jaintia kila poi palat 675 ngut bad napdeng kine kiba dih dawai ki long kumba 90%.

Ka la ïathuh ruh ba naka liang ka sorkar ka la pynbiang ïaki dawai ha man ki jaka ai jingsumar bad ki paidbah kim don kam ban siew eiei ruh em. Nalorkata, ka sorkar lyngba ka Nikshay Poshan Yojana ka ai jingïarap bai bam kaba 500 tyngka shibnai ïa/ka nongpang TB haduh bakut ka jingsumar.

Ka Dr Laloo, ka la khot la wer ïa baroh naduh ki nongtrei ka tnad ka koit ka khiah, ki paidbah ban ïasnohkti lang naka bynta ban pynduh jait ïa kane ka jingpang TB kumba la angnud da u myntri rangbah ka Ri ban rad dyngkhong ïaka hashwa u snem 2025.

Ïaka jingïalang la ïoh ka jingkren pdiang na ka Dr I Khyriem, Sr Medical & Health Officer District Tuberculosis Centre bad la pynkup burom ruh ïaki nongtrei kane ka tnad kumjuh ki ASHA.

Shuwa kane ka ka jingialang ban pynshai paidbah halor ka jingpang TB la don ka bike rally ne ka jingniah thuk thuk paidbah ban pynsngewthuh paidbah halor ka jingpang kaba la sdang na Mihmyntdu ter ter ka surok bah bad ïaid lyngba ka Ïawmusiang bad pynkut ha District Tuberculosis Centre.

Ha kane ka bike rally la rah ryngkat bad ki kor pynsawa ïaki sur jingrwai ban pynsngewthuh ïaki paidbah ban wan sha ki jaka sumar lada don ïaki dak ki shin jong kane ka jingpang kiba long ka jingjyrhoh kaba neh ar taïew ne palat kaba lah ban don ruh bad ka jingshit met, phuh syep mynmiet, jingring swai lane bym bang bam, ka jingat haki gland bad jingjyrhoh snam.