Ranji Trophy: 16 wicket la khyllem ha ka sngi ba nyngkong ka jingiakhun ka Meghalaya bad Jammu & Kashmir

Syllad | The Rising MeghalayaNovember 7, 2024

Haduh16 tylli ki wiket ki la hap ne khyllem ha ka sngi ba nyngkong jong ka jingiakhun ia ka Ranji Trophy 2024-25 Elite Group A hapdeng ka Meghalaya pyrshah ia ka Jammu & Kashmir, ba la long ha madan ka MCA, Polo haak 6 tarik Naiwieng.

Tad haduh ba kut jong ka sngi, ka Jammu & Kashmir ka la tam da 52 ron, kaba wan hadien ba ka la lah ba kan kamai 125 ron hadien ba ka la lap ba hap noh 6 wiket, kaba ha shwa ia kane, ka Meghalaya kaba la wan ba kan tied nyngkong ka la lah ba kan kamai tang 73 ron hadien ba ka la hap noh baroh ki wiket ki jong ka.

Ka khana jong kane ka ka long ba ka Meghalaya hadien ba ka la rem ha ka jingiakynting pisa (toss) ka la hap ba kan wan ba kan tied nyngkong, kaba shipor, ki arngut ki batsman jong ka Meghalaya katta u Bamanbha Shangpliang bad u Arpit Bhatewara ki la lah ba kin shan tyngeh hakhmat ki rang kawang bol (pace bad spin) jong ka Jammu & Kashmir bad kine baroh arngut ki la seng ia ka nongrim kamai ron paralok kaba 53 ron.

Hadien kane, u Bamanbha u la out noh ha u Abid Mushtaq naka bynta 24 ron bud biang sa u Arpit uba la out biang ha ki kti jong u Abid naka bynta 21 ron bad nangne shakhmat ki wiket kiba sah jong ka Meghalaya ki shu khyllem uwei hadien uwei.

Ha kaba kut ka pali wan tied  ka Meghalaya, u Abid marwei u la ioh ban khur 5 wiket naka bynta 19 ron bad u Auqib Nabi 5 wiket naka bynta 9 ron, ha kaba kine baroh arngut ki la ioh ia ka jingiarap na ka madan (pitch).

Hadien ba la wan pat ban bol, ki rang ialehkai ka Meghalaya ruh kim shim la pyndem satia ialade, ha kaba ki bowler ki jong ka, ki la ieng ban ialehkai bha bad ban pyndonkam ia ka jinglong ka madan, kaba hangne  la shem bad iohi ba ki batsman ka Jammu & Kashmir ki la mad lem ia ka juh ka jingeh kumba la long ki batsman jong ka Meghalaya.

Ki bowler b a la kham paw bha ka Meghalaya ki long u Akash Kumar 3/39  na ki 15 over, u  Ram Gurung took 1/13 na ki 4 over, u Dippu Sangma 1/49 na ki 11 over bad u Aryan Borah 1/20 na ki 6 over.

Ha shwa ba ki bowler ka Meghalaya kin khreh ban jam shakhmat, ka jingdum lyoh noh ka suin bneng ka la khanglad ia kane ka jingiakhun ba kan kut kat kum ka por kaba la buh, ia kaba ki umpire ba pyniaid ia kane ka jingiakhun ki la shim ia ka rai ban pynsangeh noh ia kane ka sngi ba nyngkong.

Ki batsman ba la kham paw bad ba la kham noh synniang bha ia ka Jammu & Kashmir dei u  Abdul Samad uba la lah ban kamai 34 ron na ki 34 tylli ki bol.

Kumta kaba sah ia ka Meghalaya hi ka long ba kin hap ban trei shitom ha ka step ka sngi kaba ar ban khanglad ia ki batsman ka Jammu & Kashmir ban nym lah ban tam palat ha ka pali tied ba nyngkong ka jong ki.