Ranji Trophy: Da ka innings bad 17 run liem ka Meghalaya ha ka Tripura

Syllad | The Rising MeghalayaOctober 22, 2024

Ka jingpyrshang ban ïakhun tyngeh ka Meghalaya ïa ka kynhun ïalehkai ka Tripura ka la poi noh sha kaba kut hadien ba ka kynhun ïalehkai ka jylla ka la mad noh ïa ka nam rem kaba long da ka innings kaba 17 run ha ka jingïakhun ïa ka Ranji Trophy 2024-25 Elite Group A  kaba la long ha madan ïalehkai kriket ka MCA, ha Polo haka 21 tarik u Risaw.

Haba wan ban sdang biang ïa la ka sngi hadien ba la lah ban kamai 3/0, ka Meghalaya ka la lap ba hap noh lai wiket khlem da lah ban kamai wat tang shi run ruh, kaba la wan hadien ba ki nongkawang (bowler) bol jong ka Tripura, ki la mih madan da ka sur kaba ki thrang bad sliang ban lah ban pynkut kloi lan ïa kane ka pali wan tied kaba ar jong ka Meghalaya.

Kumban shu phai dien biang ïa kane ka jingïakhun, ka Tripura tang ha ka sien wan tied ïa ka pali kaba nyngkong ka jong ka, ka la lah ba kan kamai 377 run hadien ba ka la hap noh 8 wiket.

Hadien ba la rai ban kyllïap noh (declare) ïa la ka pali ka Meghalaya ha ka pali wan tied kaba nyngkong ka la lah ba kan kamai 222 run bad ha ka jingwan ban tied biang ïa la ka pali kaba ar ka la lah ba kan kamai tang 122 run bad ban mad noh pat ïa kane ka namrem ka jong ka.

U bowler uba kylla long shisha u nongpynjot uba shyrkhei tam ïa ki batsman jong ka Meghalaya dei u MB Mura Singh uba ha ka pali kaba ar ka jong u, ula ïoh ban khur 5 wiket  naka bynta 44 run bad ha ka pali wan bol kaba ar, u Mura u la ïoh ban khur 6 wiket naka bynta 52 run bad kane ka la biang pura ïa u ban khur syndon ia ka nam Man of the Match.          

Da kane ka namrem ha la ïing, ka Meghalaya mynta kan khreh ba kan mih pat na la ïing ba kan leit ban aireng pyrshah ïa ka Maharashtra ka jingïakhun kaba la buh ban long ha Aurangabad naduh ka 26 tarik mynta u bnai.