Register case ka MSCW ba shah thombor ka kynthei ha ka kynhun ki shynrang ha WGH

Syllad | The Rising MeghalayaJune 27, 2024

Ka Meghalaya State Commission for Women (MSCW) ka la shim da ka suo motu case halor ka jingjia shah thombor jong kawei ka kynthei ha ka kynhun ki shynrang briew kaba la jia hapoh ka shnong ha West Garo Hills District.

Lyngba u kyrwoh ba la pyllait haka 26 tarik Jylliew, ka Commission ka la pynrem jur halor kane ka jingjia shah thombor jong kane ka kynthei hapoh ka shnong Teksragre, WGH.

Na ka liang ka Commission ka la shim da ka suo motu case bad na kaliang ka Vice Chairperson ka MSCW ha ryngkat ki dkhot ki la leit iakynduh ia u Superintendent of Police, West Garo Hills na ka bynta ban tohkit bniah halor kane ka jingjia kam bymman ha kaba na ka liang u SP u la pyntip ba na ka liang ki pulit ki la kem noh ia ki briew kiba donkti, ka la ong.

Ka Commission kan leit ruh ban iakynduh ia kane ka lanot bad ruh kan bteng ban buddien halor ki sienjam ia kiba dei ban shim bad leh halor kane ka jingjia.

Katkum ka video kaba la saphriang ha ki social media, la iohi ia ki shynrang briew jong kane ka shnong kiba la thombor tyngeh ia kane ka kynthei da kaba bom da ki siej bad patrong na u niuhkhlieh wat hapdeng ka jingiam lyniar bad ka jingkyrpad ba kin sangeh bad pyllait ia ka.