Rekomen ka UDP West Jaintia ia u Moonlight Nujorki bad u Dawan sha ka State UDP

Syllad | The Rising MeghalayaJuly 4, 2022

Ka seng United Democratic Party (UDP), West Jaintia Hills District mynta ka kynti ka la pynkhreh bha ïa elekshon MLA ka ban sa long bad la rekomen iaki kyrtong na ka lai tylli constituency hapoh jong ka District.

Haba kren bad ki lad pathai khubor ha GHM Guest House, Jowai haka sngi Nyngkong, u Secretary District Election Committee u Ma GM Lamar ula ong haka jingïalang kala rekomen lai ngut ki kandidate ban phah sha ka State Election Committee bad kine ki kynthup ia u Ma Moonlight Pariat na 2- Jowai, ka 4-Mowkaïaw Constituency da u MLA ba mynta Ma Nujorki Sungoh bad 1-Nartiang Constituency Ma Dawan Lyngdoh MDC.

Hadien ba la ïoh ïaki lai tylli ki application ki nongïalam ki la shong pyrkhat bad peit bniah ïaki application bad la shem ba ki la pyndep ïaki jingkwah katkum ka Constitution jong ka Party.

Ula ïathuh ba ïa kine ki application yn phah sha ka State Election Committee ban ai ka jingmynjur bad la leh ïa kane katkum ka Constitution jong ka Article 18 clause kaba 4 riti pyniaid kam ka UDP.

Shuh shuh ula ïathuh ba dang don sa Artylli ki application kiba dang ap kita kidei jong ka 3-Raliang bad 7-Amlarem Constituency.

U nongai buit ka UDP West Jaintia Hills u Ma Michael Sayoo ula ong, kum ki nongïalam party hapoh ka District ki don ka jingkyrmen ban kham leh bha shuh shuh ban ïaka 5 snem kaba la dep bad ki nongïalam ki la ïaid shakhmat na bynta ban pynkhreh ïaka Election ha baroh 7 tylli ki Constituency kiba don ha West Jaintia Hills bad East Jaintia Hills khamtam ka West Jaintia ka jingpynkhreh ka la ïaid bha shakhmat da ka jingkyrmen ba ka party UDP kan poi ha thong ha baroh 7 tylli ki Constituency.

Ka President UDP Women’s Wing ka Kong Robila Mylliempdah kala ïathuh ba na liang ka Jowai Constituency ki la trei bor bah met bad mynsiem khnang ba ka UDP kan wan haka jingjop. Ka la kyntu ïaki nongshong shnong ka Jowai Constituency ban ai ka jingkyrshan ïaka UDP ha une u 2023 khnang ba ka jingjop jong ka UDP kan long kaba phuh ba phieng.

U MDC ka Mynsngat Khanduli u Ma Dawan Lyngdoh ula khmih lynti ba ka Election MLA 2023, ka party UDP kaba pynïeng kyrtong ha baroh ki Constituency ha Rilum Jaintia kan thaw record sa shisien kumba ka la pynkhreh.

Ka Secretary UDP Women’s Wing ka Kong Slinda Syngkrem ka la ong ba na ka liang jong ka seng kynthei ki la pyrshang ban pynkhlaiñ ïaka party bad nangne shakhmat kin nangtrei shitom shuh shuh khnang ba ka UDP kan ïoh ïaka jingjop kaba don burom.