Reservation Policy: Ai jingmut ka HYC ban kyllum lang 93% ka bhah sha ki ST ka Jylla

Syllad | The Rising MeghalayaOctober 4, 2024

Ka Hynniewtrep Youth Council (HYC) ha ka 3 tarik Risaw kala tyrwa ban kyllum lang ia ka bhah ba 93% sha baroh ki Scheduled Tribe jong ka Jylla ha ka State Reservation Policy ba thymmai.

Haba phah ia ka jingai jingmut sha ka Expert Committee halor ka State Reservation Policy ha ka public hearing ba la pynlong ha Shillong, u President ka HYC u Bah Roykupar Synrem u la ong, “Da kaba pynshong nongrim halor ka jingdon jong ki nongshong shnong kiba dei ki paid Khasi bad Jaintia, ka bhah ka dei ban long long 50% na ka bynta ki Khasi bad Jaintia, 40% na ka bynta ki paid Garo bad 3% na ka bynta kiwei pat ki ST. Kawei pat ka jingpynbeit ka long ba ngi la aijingmut ban ai kyllum lang noh da 93% ia baroh ki ST ka Jylla khnang khnang ba kan don ka jingialeh hapdeng jong ki, 2% ia ki SC bad 5% ia ki unreserve.”

U Bah Synrem u la ong ruh ba ka Seng HYC ka sngew ruh ba ia kane ka Job Reservation Policy ym dei ban pyntreikam lane pyniar ia ka jingai bhah na ka bynta ban ioh pynrung sha ki jaka pule lane ban leit pule ia ki jingpule kiba kham shalor shabar ka Jylla na ka bhah jong ka Sorkar Jylla.

“Nalor kata, ngi don ruh ka jingsngew ba ka Sorkar jylla ka dei ban wanrah la ka jong ka ain katkum ka Article 15 (4) jong ka Riti Synshar Ri na ka bynta ban ai bhah haba pynrung klas sha ki jaka pule lane ban leit pule ia ki kyrdan ba shalor shabar ka Jylla na ka bhah jong ka sorkar,” u la bynrap.

U la ong ba lada ka sorkar ka thaw la ka jong ka ain halor kane ka bynta, kumta ruh ngi sngew ba dei ban kyllum lang ia ka bhah kaba 93% ia ki ST, 2% ia ki SC bad 5% ia ki Unreserve. Ha kaba iadei bad ki kam ba lait ha ki District, ka HYC ka sngew ba dei ban pynneh ia ka jingai bhah ba kyllum lang ia ki ST.