Reservation Policy: Dawa ka JCCRP ban bhah lang noh ia ka 80% ia ki Khasi, Jaintia bad Garo

Syllad | The Rising MeghalayaJuly 13, 2024

Ka Jaintia Coordination Committee on Reservation Policy (JCCRP) ka la dawa ban wanrah noh da ka ain kaba shai ha kaba iadei bad ka jingpyntreikam ia ka Meghalaya State Reservation Policy ha kaba kan don ka jingkdew bniah ha ka liang ka ioh kam ioh jam bad ha ka pule puthi bad kiwei pat ki bynta.

Ka JCCRP kaba kynthup iaki sengbhalang bad ka synjuk waheh shnong ri Jaintia kala ai jingmut ba ka dei ban bhah lang noh ia ka 80 percent na ka bnta ki jaidbynriew Khasi, Jaintia bad Garo da kaba pynshong nongrim ruh halor ka jingwan shakhmat bad ka jinglah ha ka jingiakhun hapdeng jong ki.

Ka JCCRP kaba la leit ban ai da ka dorkhas halor kane ka jingdawa ha u Bah LK Diengdoh, Secretary ka Expert Committee on the State Reservation Policy ha ka 12 tarik mynta u bnai ka la pynpaw ruh ba kane ka jingtyrwa kan plielad lang ia baroh bad ba kan don ruh ka mynsiem jingiakhun bad ban jied ia ki kyrtong kiba wan shakhmat katkum ka jinglah ka jong ki.

“Da kaba pyntreikam ia kane ka sienjam ba la pynkylla, ngi ngeit ba ka jylla jong ngi ka lah ban pynbha shuh shuh ia ki rukom treikam ha ka synshar khadar bad ban pynbha ia ki jingshakri paidbah.”

“Kane ka jingpynkylla kan pynroi ruh ia ka kolshor jong ka jinglong bad ka ban ai ia ki jingmyntoi kiba neh ia ka jylla bad ki nongshong shnong jong ka,” ong ka JCCRP ha ka dorkhas ba san sla jong ka.