Reservation Policy: Dawa ka VPP ban ithuh ia ki paid Khasi Jaintia kum kawei ka Jaidbynriew

Syllad | The Rising MeghalayaJune 15, 2024

Ka liang pyrshah Voice of the People Party (VPP) ka la aijingmut ba ka percentage jong ka jingbhah na ka State Reservation Policy na ka bynta ki paid Khasi – Jaintia bad Garo, Scheduled Caste bad kiwei pat ki riewlum dei ban pynshong nongrim lyngba ka jingdon paid katkum na ka khanasamari jong u snem 1971, kata haba ban jur halor ka jingdonkam ban ithuh ia ki paid Khasi Jaintia kum kawei ka jaidbynriew.

Ha ka shithi sha ka Expert Committee halor ka State Reservation Policy ha ka 14 tarik mynta u bnai, u President ka VPP u Bah Ardent Miller Basaiawmoit u la ong, “Ka percentage jong ka jingbhah ia ki Khasi, Jaintia bad Garo, Scheduled Caste bad kiwei kiwei ki riewlum dei ban pynshong nongrim katkum ka jingdon paid jong ki bad katkum ka khanasamai jong u snem 1971. Dei ban shim ia ki nongshong shnong kiba dei ki Khasi bad Jaintia kum kawei ka jaidbynriew.”

Une u nongialam ka VPP u la ong ruh ba ka State Job Reservation Policy watla ka kdew shai ba “ka jingmihkhmat kan long katkum ka jingdon paid” hynrei ym shym la shim pat ia ka jingkhein jong ka khanasamari haba sam ia ka percentage halor ka jingsam bhah.

“Namar kata, ka jingbhah kaba 40% na ka bynta ki Khasi – Jaintia, 40 percent ia ki Garo bad 5 percent ia ki SC bad kiwei ki ST ka dei ka bym shong nongrim satia haba shim ia ka rukom khein. Ka jingbhah ia ka percentage ka dei kaba la shu mutdur ha ka jaka jong ki jingshisha kiba katkum ka jingkhein. Kumta ruh ka long kaba iaid pyrshah ia ka jingthmu jong ka policy,” u la ong da kaba bynrap, “Ka jingbym lah jong ka sorkar Meghalaya ban pyntreikam ia ka Roster System haba pyntreikam ia ka job reservation khatduh ka dei kaba la pynbeit da ka hukum jong ka iingbishar Meghalaya High Court ha u snem 2022”.

Nalor kata u Bah Ardent u la ong ruh ba dei ban ai la ka jong ka percentage ia ki SC bad ia kiwei pat ki ST haba buh kyndon ba ka jingthung kam ia ki ha ka reserve bad unreserved post ha ka Jylla ka dei ban long ba ki dei ban nang ban kren ia ki Associate Office Language ka Jylla, kata ia ka ktien Khasi lane Garo.

Shuh shuh u la ong ba tang ki nongshong shnong ka Meghalaya ki dei hok ban shah thungkam la ka dei ha ki kam ba la  bhah ne bym pat bhah ha Meghalaya” ula bynrap.