Reservation Policy: Tyrwa ka KSU ia ka bhah ba 50%  ki Khasi-Jaintia,40% ia ki Garo

Syllad | The Rising MeghalayaOctober 3, 2024

Ka Khasi Students Union (KSU) ka la ban jur ba ka State Reservation Policy bathymmai ka Jylla ka dei ban bhah 50% ha ka thungkam thungjam na ka bynta ki Khasi bad Jaintia, 40% sha ki Garo, 5% sha kiwei ki Scheduled Tribe bad 5 % sha ki Unreserve category.   

Ia kane ka jingai jingmut ka KSU ka la leit ban pynsngew sha ki dkhot ka Expert Committee on the State Reservation Policy kaba la pynlong ia ka Public Hearing kaba lai sngi kaba la sdang haka 3 tarik Risaw ha Shillong.

“Ha ka jingiakren bad ka Expert Committee, ngi la aijingmut ba lada iaid ia ka jingai bhah katkum na ka jingbun paid, kumta ruh ngi sngew ba ka jingai bhah hapdeng ki Khasi bad Garo ka dei ban long 50% sha ki Khasi-Jaintia bad  40% sha ki Garo, 5% sha kiwei pat ki ST bad 5% sha ki Unreserve. Ngeit ia ka jingkren jong nga, kam dei kyllum lang hynrei ka Unreserve ka mut ban plielad ia baroh,” ong u General Secretary ka KSU u Samla Donald V Thabah haba kren hadien ka jingialang.

“Kawei pat ka sienjam ka long ba lada kane ka jingtyrwa kam lah ban long, kumta ruh ka jingai bhah ka dei ban long 90% ia ki Khasi -Jaintia bad Garo bad 5% na ka bynta kiwei pat ki ST bad 5% ki Unreserve. Kine ki dei ki artylli ki jingai jingmut ba ngi la buh hakhmat ka Committee,” u la bynrap.

U samla Thabah u pyntip ruh ba ka KSU ka la aijingmut ba lada dei ban pynmih ia ka Reservation Policy ba thymmai, ka policy kam dei ban treikam naduh ki snem ba la leit noh, kam dei ban don ka jingphaidien, ka dei beit ban long kaba thymmai bad sdang da kaba thymmai.

Nalor kata u la ong ruh ba ka KSU ka la tyrwa ruh ban bhah beit 100% na ka bynta ka jingthungkam ia ki nonghikai skul Lower Primary bad Primary ha ka Jylla na ka bynta ki Khasi Jaintia hapoh Rilum Khasi bad Jasintia bad ia ki Garo ha Rilum Garo.

“Ka jingai jingmut kaba khatduh ka long ba ngi ngeit ba halor ka pule puthi ka bhah thungka ruh ka don ka jingiadei bad ka long ruh kaba kongsan haba ngi pynioh ia ki jinghikai sha ki khynnah ha ki skul Lower Primary bad Primary, ngin hap ban iakren bad aijinghikai sha ki kyntien da la ki jong ki ktien,” u la ong.

“Kumta ngi la aijingmut ba ha Rilum Garo, 100% ka bhah sha ki nonghikai ka dei ban leit sha ki Garo bad kumjuh ruh ha Rilum Khasi Jaintia 100% ka bhah kadei ban leit sha ki Khasi bad Jaintia namar ngi sngew ba ki Garo kin ym lah ban hikai sha ki khynnah Khasi da ka ktien Khasi lada ngi iaid da ka 40:40 lane 50:50 lane ki Khasi ba kin leit sha Garo ban hikai da ka ktien Garo. Na ka bynta ban pynjanai ia ka pule puthi, ngi la aijigmut ia kane ka bhah ba 100% na ka bynta ki nonghikai ha ki skul Lower Primary bad Primary kynthup ia ki skul SSA,” u la bynrap.