Rit mynsiem ki nongshong shnong Kharkhana ba shlei ka wah Tisang, 352.2 mm ioh slap haka shisngi

Syllad | The Rising MeghalayaMay 30, 2024

Ki nongshong shnong ka Kharkhana ki shong syier mynsiem tang shu poi ka aiom slap namar kadei ka shnong kaba don sharum ka wah Myntdu kaba la tip kum ka Wah Tisang ha kane ka thain. Kane ka shnong ka dei kaba kaba la kerkut da ki shnat wah kiba rit bad ka long kum ka dewlynnong ha ki por lyiur khamtam haba ther jur u lapbah lapsan.

Ka shnong Kharkhana ka jngai tang 41 km na Amlarem Block bad 65 km na ka nongbah Jowai.

Kane ka shnong na ka jingwan lyngshop ka eriong Remal, kala shah ktah bha na ka jingshlei jong ka wah Myntdu kaba la poi shaduh iing briew, iingmane, iingskul, jaka rep bad shaduh ki jaka ri jingri bad kaba la wanrah ka jingduh nong kaba khraw ia ki lada ki shah Rong ne shah tep ha ka umsaw.

Ki nongshong shnong ki iathuh ba kim ioh thiah ioh dem namar ki hap ban peit bad sumar ia ki lieng kynda ioh ba ki shah rong ha ka umsaw.

Kane ka shnong ka don 3 tylli ki wah rit kiba pynthut bha ia ka leit ka wan ki nongshong shnong lyngba ka surok namar tang shu ther u lapbah kine ki wah ki shlei bad ka um ka iaid nalor u surok bad bunsien haba jia kum kane ka khep ki nongshong shnong ki hap ban shong iing wat tang ban leit sha ki jaka sumar ruh um lait shuh na ka jingshlei um kumjuh ki mar rep mar riang ki pyut.

Katkum ka jingthew jong ka ophis ka sorkar pdeng ka Central Water Commission (CWC) kaba don ha ka shnong Kharkhana, la ong ba u lapbah u la ther ha ka shnong Kharkhana ha ka 29 tarik Jymmang u la poi haduh 352.2 mm kaba la wanrah iaka jingshlei um ka shnong naka jingioh bun u slap haka shisngi

Ka shnong kharkhana ka kyrpad ia ki bor ba dei khmih ban leh eiei na ka bynta jong ka shnong khnang ban suk ha ka leit ka wan da kaba pynioh iaka surok kaba paka ban leit ban wan na Muktapur-Kharkhana. Kane ka shnong ka iasoh ruh bad ka East Jaintia Hills na Borghat lyngba ka surok Rymbai Borghat Sonapur Road.