Rung final ka EKH bad Ri Bhoi ha ka Women’s Football; Ri Bhoi bad WKH ha U-17 Boys haka Meghalaya Games

Syllad | The Rising MeghalayaJanuary 23, 2025

Ki jingialehkai football semifinal jong ki kynthei (Women’s Senior) ha ka lympung 6th Meghalaya Games 2025 ka la khring ia kiba bun bah ki nongpeitkai ban sakhi ia ki sap ki phong bad ka jingtbit jong ki nongialehkai hapoh Kiang Nangbah Stadium, Jowai.

Ha ka jingialehkai kaba nyngkong ha ka por mynstep, ka Ri Bhoi District ka la lah ban pynrem noh ia ka West Jaintia Hills District da 2-0. Ia kine ki kol la thep da ka Daphisha Syngkli bad ka Pynibha Rangthaluh, kaba la pynlong ia ka ba kan ioh rung sha ka final ha ka samoi kaba ar kynthih.

Ha ka jingialehkai ia ka semifinal kaba ar, ka East Khasi Hills District ka la pynliem noh ia ka South West Khasi Hills District da 2-1 ha ka jingialehkai kaba mar ia khaid. Ia baroh kine ki artylli ki kol la ioh thep da ka Sanfida Nongrum bad kaba la kylla long ruh ka khlur jong kane ka jingialehkai. Katba ka Darishisha Kharlyngdoh ka la ioh ban thep ia ka shi kil na ka bynta ka SWKH. Kane ka la pynlong ia ka EKH ba kan pynskhem ban ioh iakhun ia ka final.

Ka jingiakhun ia ka semi-final jong ki Under-17 Boys hapdeng ka Ri Bhoi bad ka West Jaintia Hills ka la long kaba shongshit bad kaba mar ia khlainbor ha kaba ym shym la don kiba lah ban thep kol haduh ba la kut ka por hadien ba la hap ban pynlong da ka jingiashut tiebreaker ha kaba ka Ri Bhoi ka la lah ban pynliem noh da 4-3.

Kumjuh ha ka jingialehkai ia ka semi-final kaba ar, ka West Khasi Hills ka la long ka nongjop hadien ba ka la lah ban pynliem noh ia ka South West Khasi Hills ha ka jingiashut tiebreaker da 5-4.