Rung final ka Nongdawah SC haka 1st Grosswell Mylliemngap Memorial Football Tournament ha Mawryngkneng

Syllad | The Rising MeghalayaDecember 13, 2021

Ka kynhun ba pawkhmat napoh ka shnong Mawryngkneng ka kynhun Nongdawah ka la ioh ban jam sha ka Final jong ka 1st Grosswell Mylliemngap Memorial Football Tournament 2021 ba la pynlong da ka Mawryngkneng Cultural & Sports Club ha madan Mawryngkneng stadium.

Ha ka jingiakhun Semi-Final kaba lah long hapdeng ka Nonggdawah bad ka Mawmang ka lah long shisha kaba itynnad haduh katta ha kaba baroh artylli ki kynhun ki lah long ki ba biang bor.

Dei ka kynhun Mawmang kaba lah kabu nyngkong bam pynkhih jar ha kaba u rangialehkai khmat jong ka u Jop u la ioh ka bol para marwei bad u Kol hynrei ka jingbym lah ju ban tehlakam ia ka bol u la kynjat noh wak sha kynriang khlem shu pynsepkai ia ka kabu .
Kumta ha kaba kut jong ka kylla step ka jingialehkai ka la kut noh hapdeng ka jingiakhaid.

Hadien ba sdang ka jong ka kylla miet ka Mawmang ka la nang ioh bor shuh shuh ban control bunshah ia ka bol ban ia ka kynhun Nongdawah bad dei ha ka minit ba 72 ka Mawmang ka la ioh ia kabu kaba khraw ha kaba da ka rangialehkai jong ka u Mark Diendoh u la ioh ban khyrwit ha ka biang ban pynkhih jar hynrei ka jinglen lade jong u rangialehkai dien ka Nongdawah u Atlanson u la iada ia ka bol da ka kti kaba ym don las shuh da ka kjat bad ka bol ka khlem ioh rung shuh sha kol bad u referee mar mar u la mareh ban ai red card direk ia u Atlanson.

Hynrei wat hapdeng ka jinhduh noh uwei u rangialehkai hapdeng Madan ka Nongdawah ka la kham ioh bor pynban ban ialehkai bad kyrda ialade ban pyniakhaid haduh kaba kut.

Kumta ka rai jop rai rem ia ma jingialehkai la poi sha ka Tie-breaker Breaker bad kumta ka Nongdawah ka la jop pat da 4-3 kol ia ka Mawmang.

Ka Nongdawah mynta kan ap ia ka kynhun kaban jop na ka Semi-Final kaba ar kaban long ka 15 tarik haldeng ka Nonghali pyrshah ia ka Nongkhroh Rim.