Rung ka Jylla Meghalaya sha ka final round Santosh Trophy hadien ba iakhaid bad ka Assam

Syllad | The Rising MeghalayaNovember 24, 2024

Ka kynhun ialehkai phubol ka Meghalaya ka la poi sha ka jingiakhaid da 1-1 pyrshah ia ka Assam kaba la long ha Nalbari, Assam ha ka 24 tarik Naiwieng. Kane ka jingiakhaid kala pynlong ia ka Meghalaya ba kan ioh rung syndon sha ka final round jong ka lympung Senior Men’s National Football Championship for the Santosh Trophy 2024-25.

Lyngba kane ka jingiakhaid bad ka jingjop pyrshah ia ka Nagaland bad ka Arunachal Pradesh ka Meghalaya ka la wan ha ka kyrdan kaba halor eh ha ka Group E da kaba ioh 7 poing bad ioh rung sha kawei pat ka round jong ka Santosh Trophy

Na ka liang u Coach ka Meghalaya u Bah Hering Shangpliang u la pynmih bujli tang uwei u player da kaba wanrah ia u Baiaikara Swer ha ka jaka jong u Kevin Rymbai hapoh Midfielf ha kane ka jingialehkai.

Ka Meghalaya ka tip bha ba ha kane ka jingiakhun kaba donkam tang ban iakhaid na ka bynta ban ioh rung sha kawei pat ka round ha kaba u Damanbhalang Chyne u la ioh ban pynkhih jar ha ka minit kaba 56. Hynrei hashwa ban kut noh ka jingialehkai ka Assam ka la ioh ban pyniakhaid lyngba ka penalty ha k minit kaba 88 lyngba u Dipu Mirdha bad kaba la kut noh ha ka jingiakhad da 1-1. Ha kane ka jingialehkai u Damanbhalang u la ioh ia ka khusnam Player of the Match.

Ha kane ka jingialehkai la leit ban ai mynsiem ia ki rang ialehkai ka jylla da u President ka Meghalaya Football Association u Bah Hamletson Dohling, General Secretary Bah Sunesh Syiem bad u nongai buit ka sorkar Meghalaya u Bah HM Shangpliang.

Ka Meghalaya ka la shah pynhap ha ka Group B ha ryngkat ka Goa, Tamil Nadu, Kerala, Delhi bad Odisha.

Ka kynhun jong ki rangialehkai ka Meghalaya kiba la iakhun hynne ka sngi U Blei ki kynthup ia u Siwel Rymbai (GK), Overkindness L Mawnai, Arlangky Nongsiej, Donborlang Nongkynrih (sub Banraplang Pyngrope 45’+4), Wanboklang Lyngkhoi, Aibiangmame Nongneng (sub Fairming Suting 77′), Robertson Khongriah, Fullmoon Mukhim, Damanbhalang Chyne, Baiaikara Swer, Donlad Diengdoh (sub Aenam Jyrwa 90′).

Ka Meghalaya kan iakhun pyrshah ia ka Tamil Nadu, ha ka 15 tarik u Nohprah, ia ka Kerala ha ka 17 u Nohprah, Delhi, ha ka 19 tarik u Nohprah, Goa, ha ka 22 tarik u Nohprah bad pyrshah ia ka Odisha ha ka 24 tarik u Nohprah.