Rung quarter final sa ka Maitchaphrang Khliehmuchut haka Third Div ka WJDSA

Syllad | The Rising MeghalayaMay 7, 2022

Ka Maitchaphrang Mootyrchiah bad ka Khliehmuchut Shangpung kila buh jaka ïalade haka jingïakhun quarter final Third Division Football ka West Jaintia District Sports Association (WJDSA).

Kane kala wan hadien ba kila khur namjop haka jingiakhun pre quarter final pyrshah iaka Roayalpole Mihmyntdu bad ka Iong I Dahi haka jingiakhun kaba long haka sngi Thohdieng ha Kiang Nangbah Stadium.

Ka Maitchaphrang Mootyrchiah kala pynliem da ka tie breaker 6-5 ïaka Royalpole Mihmyntdu. Haka jingiakhun kine ki arliang mamla kila iakhaid mar 1 kol. Na kaliang ka Royalpole la thep da u Sumarlangki Suting (64), katba na ka Maitchaphrang Mowtyrshiah la thep da u Risanlang Dkhar (69).

Ka Khliehmuchut Shangpung kala da 4-1 kol iaka Iong i dahi FC. Ia ka kol ka Iong i dahi FC la thep da u Atal Shylla (5), katba ka Khliehmuchut Shangpung la ïoh ban thep da u Arwan Phadong (34), u Elizer Suiam (47), u Dameki Rabon (57) bad u Rangdajied Sayoo (80+3).

Lashai ka sngi ka jingïakhun pre quarter kan long hapdeng ka Mawsiang FC pyrshah ïaka Lumchyrmang Mihmyntdu haka por 1.00 baje nohphai sngi bad ka jingiakhun pre quarter final kaba khatduh kalong hapdeng ka Pasyih cultural sports club pyrshah ïaka Pateinki Sabah haka por 3.00 baje nohphasngi.