Rung quarterfinal ka Nangbah Mulang bad ka Namrhenlang haka football Pdengshakap

Syllad | The Rising MeghalayaFebruary 3, 2025

Ka Nangbah Mulang SC bad Namrhenlang I FC kila rung shaka quarter final jong ka ’11th Pdengshakap Secondary School Invitation Football Knock-out Tournament’ kaba pyniaid da ka Dorbar shnong Pdengshakap.

Kane kala wan hadien ba kine ki ar kynhun kila khur jingjop haka jingialehkai jong ka wat kaba ar ne 2nd Round kaba la long ha madan Pdengshakap haka sngi Saitjaiñ.

Haba phai shaka jingialehkai ka Nangbah Mulang SC kala jop iaka Synroplang FC da 2-0. Ia kine ki kol jong ka Nangbah Mulang SC la thep da u Olives Pale (30) bad Living Phawa (51).

Haka jingialehkai kaba bud, ka Namrhenlang-i FC kala pynliem iaka Golden Lion (Rymbai) da 4-3 lyngba ka jingiashut Tie-breaker hadien bym don mano mano ka lah ban thep kol haka por ba la buh.

Ka jingialehkai kan bteng haka 8 tarik Rymphang hapdeng ka Azad A FC 2 pyrshah iaka DC haka por 12.00 baje mynsngi, ka KSF FC pyrshah iaka Golden Lion Syndai FC haka por 2.00 baje nohphai sngi.