Rung quarterfinal ka Rymbai Madanpynriang, Musniang, Ladrymbai Dongwah bad kiwei haka 2nd Div ka EJHDFA

Syllad | The Rising MeghalayaSeptember 14, 2024

Ka 2nd Division Football Tournament kaba pyniaid da ka East Jaintia Hills District Football Association (EJHDFA) kaban jam noh artad sha ka kyrdan quarterfinal bad kaba sah ka long sa tang ar tylli ki jingialehkai ha ka taiew ka ban wan ban pynthikna mano ban ioh rung na ka jingialehkai kaba khatduh na ka pool B bad D.

Ki kynhun kiba la buh jaka ialade haka kyrdan quarter final ki kynthup iaka Rymbai Madanpynriang SC, Ladrymbai Dongwah SC na ka pool A, Musniang SC na ka pool B, Umlyngsha Youth SSC bad Lumputhoi SC naka pool C bad Lakadong Umlatdoh na ka pool D.

Kine ki kynhun kila lah ban pynthikna ban buh jaka ialade haka kyrdan quarterfinal hadien ka jingiakhun kaba long ha 14 tarik Nailur ha madan artificial turf ha Diengshynrum.

Haba phai sha ka jingialehkai, ka Musniang SC kala pynliem da 3-0 iaka Iapmala UTD SC. Ia kine ki kol jong ka Musniang la thep Mardi Rymbai (14), One enjoy Dkhar (44) bad Yookilang Siangshai (69).

Haka jingialehkai kaba bud, ka Rymbai Madanpynriang SC kala pynliem da 1-0 iaka Ladrymbai Dongwah SC. Ia kane ka shikol la thep da Encourage Dkhar (74).

Ka jingialehkai hapdeng ka Lumputhoi SC pyrshah iaka Umlyngsha Youth SSC kala kut noh da kaba iakhaid mar 2-2. Na kaliang ka Umlyngsha Youth la thep da u Eleven Biam marwei ar kol (6, 43), katba na ka bynta Lumputhoi la thep da u Midrik Lyngdoh (17) bad Forjoin Lyngdoh (72).

Ka jingialehkai kaba khatduh jong ka wat kaba nyngkong kan long haka 16 tarik na ka pool D kan long hapdeng ka Dienshalalu pyrshah iaka Iongkaluh SCSC haka por 12.00 baje mynsni. Naka pool B ka Musniang SC pyrshah iaka Sutnga Mission SSCC haka por 2.30 baje nohphai sngi.