Rung Round 16 ka Lumshnong, Lakadong Ummat bad ka Ryntihlang haka 3rd Div ka EJHDFA

Syllad | The Rising MeghalayaSeptember 26, 2024

Ka Lumshnong YWSC, Lakadong Ummat SCC bad ka Ryntihlang SC Brichyrnot kila lah ban pynthikna ialade ban buh jaka haka wat kaba ar – Round 16 haka kyrdan 3rd Division Football Tournament kaba pyniaid da ka East Jaintia Hills District Football Association (EJHDFA).

Kane kala wan hadien ba kine ki lai kynhun kila khur namjop haka jingialehkai kaba long haka 26 tarik Nailur ha madan artificial turf Diengshynrum.

Haba phai sha ka jingialehkai, ka namjop ka Lumshnong YWSC kala wan pyrshah iaka Shiborlang SC Pynthorsale da 5-0. Ia kine ki san kol la thep mar shikol da u Justin Niang (9), Duniwan-o- Mukhim (15), Evening Pohshna (65), Pynshe Syrti (68) bad u Arniki Suchiang (73).

Ka Lakadong Ummat SCC kala jop da 2-1 iaka Bataw FC. Na kaliang Lakadong Ummat la thep da u Ebormi Lyngdoh (65) bad Firstomi Chadong (69). Katba na ka Bataw la thep da u Wellson Lyngdoh (48) kaba mih paw haka dur ka own goal.

Haka jingialehkai kaba khatduh, ka Ryntihlang SC Brichyrnot kala jop da 1-0 iaka Musniang DWKSC. Ia kane ka kol ka Ryntihlang la thep da u Thomas Massar (40) bad kane ka kol kala neh haduh ba kut ka jingialehkai.