Rung semifinal sa ka Diengshynrum haka Second Div ka EJHDFA

Syllad | The Rising MeghalayaSeptember 9, 2023

U Rumi Lyngdoh marwei ula khyrwit haduh 4 kol bad pynlong iaka Diengshynrum SC ba kan khur jingjop bad rung shisyndon shaka jingiakhun Semi Final jong ka lympung ialehkai Second Division Football Tournament kaba pyniaid da ka East Jaintia Hills District Football Association (EJHDFA).

Kane ka wan hadien ba ka Diengshynrum SC ka la pynliem iaka Umlyngsha Youth SSC da 5-0 haka jingiakhun Quarter kaba lai kaba la long ha madan Artificial Turf kaba don ha Diengshynrum, Khliehriat haka sngi Thohdieng.

Nalor ki 4 tylli ki kol ba la thep da u Rumi Lyngdoh haka minit kaba 23, 48, 69 bad 81, u Winson Swer ruh ula ioh ban thep haka minit kaba 85.

Ka Diengshynrum ka long ka kynhun kaba lai kaba buh jaka sha ka Semi Final kynthup iaka Pamrakmai SC bad Iatyllilang Hingaria. Ka jingiakhun Quarterfinal kaba khatduh kan long haka 11 tarik une u bnai hadpeng ka Jalyiah pyrshah iaka Lad Dongwah

Haba phai shaka jingiakhun 3rd Division, ka Khliehmyntriang SC bad ka Lummyrli SC ki la rung shaka jingiakhun Quarter Final hadien ba ki la khur jingjop haka jingiakhun jong ka wat kaba 16.

Ka Khliehmyntriang SC ka la pynliem noh iaka Ratacherra CSC da 5-3 kaba la wan lyngba ka jingiashut Penalty hadien ba ka por ban iakhun ka la kut da ka jingiakhait kaba mar 1-1.

Iaka kol jong ka Khliehmyntriang la thep da u Raplangki Lyngdoh haka minit kaba 03 katba iaka kol jong ka Ratacherra la thep da u Gradely Mylliem haka minit kaba 34.

Haka jingiakhun kaba bud, ka Lummyrli SC ka la pynliem iaka Bataw FC da 3-2 kaba la wan lyngba ka jingiashut Penalty hadien ba ka por ba la buh ban iakhun ka la wai da ka jingiakhiat kaba mar 2-2.

Iaki kol jong Bataw FC la thep da u Firstborn Pohlong (OG) haka minit 16 bad u Hiwot Patwet haka minit kaba 67, katba iaki kol jong ka Lummyrli SC la thep da u Winson Bamon haka minit kaba 9 bad u Firstborn Pohlong haka minit kaba 83.

Ka jingiakhun kaba khatduh jong ka wat kaba ar kan long haka 11 tarik Nailur hadpeng ka Mutong YSC pyrshah iaka Pynthorsale bad ka Umrasong pyrshah iaka R Madanpynriang.