Ryngkat ka jingbynnud ai khublei khatduh ka ïing ka sem bad ka SPC ia u bah Sameer Sohliya

Syllad | The Rising MeghalayaJune 13, 2021

Iaka met kaba sah jong u bah Sameer Sohliya, nongthoh khubor ba bat ruh iaka kyrdan senior correspondent jong ka kot khubor Sentinel, ba la khlad noh hynnin ka sngi ka 12 tarik Jylliew 2021, la on thang don burom noh mynta ka sngi Robibar ha u lum jingthang briew jong ka Seng Khasi,ha Jaiaw.

Ka jingkhlad noh ka jong u bah Sameer, da shisha ka long ka jingduhnong kaba khraw tam iaka kynhun jong ki nongthoh khubor jong kane ka jylla, kaba ha kine ki khyndiat snem kiba la dep, shu san kynsan ki nongthoh kot khubor kiba la san la rangbah ne kiba la ih bha katta ka main ka kyrdan thoh khubor, ki la khlad noh na kane ka sla jong ka pyrthei.

U Bah Sammer u la rung sha kane ka kam thoh khubor naduh ka snem 1994 bad ban iai trei ia kane ka kam tad haduh ka khyllipmat ba un da khlad noh na kane ka sla jong ka pyrthei.

U la sdang ban rung nyngkong ha ka kam thoh kot khubor bad Apphira, ban bynrap pat saka Media Plus bad hadien kane, u la rung pat bad ka kynhun jong ka kot khubor Sentinel.

Dei ynda haba u Sameer u la sdang ban san bha ha ka kam thoh khubor, ba hangne kein ba u pynpaw hakhmat ka pyrthei, ba u long u briew u bym riej ne bym salia ban thoh ia kano kano ka khubor kaba dei ka jingshisha, don ruh ki khep haba u don ha ka jingialang ia kynduh ne ki press conference kampher lada dei ki Myntri Sorkar, ki Myntri naka sorkar Pdeng, ne ki heh ophisar, u Sameer haba u buh ha khmat ia kano kano ka jingkylli ka da pynrah bha ia ki shkor kiba shim ban jubab iaka jingkylli kaba u buh, namar ha kano ma kano ka press conference u Sameer haba u rung u da long uba pynkhreh.

Dei kane ka jinglong kaba kiba bun na ki longdien haba ki rung ha kane ka kam, u Sameer u long u nongmait lynti ia ki, ha kaba u juh iai kyntu bad ai mynsiem ia kiba dang shu wan ban rung ha ka kam.

Shuh shuh u Sameer u long u nongthoh khubor ba da lei lei ubym ia pein iaka kam kaba u trei, da kaba u iengskhem hi triang halor ka nongrim ban shakri hok ia ki paid jong ka jylla.

Iaka met kaba sah jong Sameer la on thang don burom ha u lum jingthang briew jong ka Seng Khasi ha Jaiaw, ha shwa ban rah ia kamet na iing, ka iing ka sem ka la pyndep ruh iaka lehniam ka leh rukom ha kaba la ioh iaka nguh ka dem ka dwai ka phirat da u Rgh Diben Syiemlieh, bad hadien kane, iaka met la wanrah ha phyllaw jong ka Shillong Press, kaba dei hangne ba ki paralok thoh khubor ki la ioh lem ban ai khatduh ia u bah Sameer da ka jingkren lyngba u President ka Shillong Press Club u bah David Laitphlang.