Ryngkat ki bor district kyntu ka KSU-EJH ban iakhun pyrshah ia ka jingjyllei u drok

Syllad | The Rising MeghalayaAugust 12, 2023

Ka Khasi Students’ Union (KSU), EJHD, ha ka sngi Thohdieng ba la lah ka la phah da ka jingthoh sha u Deputy Commissioner ka East Jaintia Hills ban pynpaw ka jingsngewkhia kaba jur ha kaba iadei bad ka jingkynrei jong u drok hapoh ka district bad ruh ban shim ia ki sienjam ban iatreilang bad ki bor district ban iakhun pyrshah ia une u jait jingdih ba shyrkhei.

Ka KSU ha u kyrwoh lyngba u Streamly N Suchen president bad Pynshai Kupar M Dkhar Assistant Geneneral Secretary ka la ong ba ka jingwan tuid jong u drok hapoh ka district bad ka jylla kaba la ktah jur bha ia ki samla ka la wanrah ruh shibun ki jingeh ha kiba bun ki longiing longsem, ki shnong ki thaw bad ka imlang sahlang hi baroh kawei.

Kumta ka Seng ka la ai jingmut ia u heh ka district (DC) na ka bynta ban shim ia ki lad jingiada khamtam hapoh kane ka district kaba la sakhi ia ka jingkynrei jong une u jait jingdih lyngba ka jingpynlong ia ki kynja jingpynshai paidbah ha ki skul na ka bynta ki khynnah bad ki samla khnang ba kin lah ban kiar na une u jait jingdih.Nalor kata ka la aijingmut ruh na ka bynta ban pynlong da ki jingiamir jingmut hapdeng ki kynhun bapher bapher halor kane ka bynta.

Na ka liang ka KSU ka la ai jingmut ruh ban pynkhlain shuh ia ki bor pahara bad ruh ba ka tnat pulit kan iatrei ryngkat bad ki seng samla shnong, ki dorbar shnong bad kiwei kiwei khnang ban lah ban pynduh jait ia une u jait jingdih uba la ktah jur ia ka imlang ka sahlang hi baroh kawei.

Nalor kata na ka liang ka KSU ka la pynpaw ruh ba kan sa iamir jingmut bad ki bor pyniaid shnong na ka bynta ban buh ia ki jaka ialehkai kilan met khnang ba kan iarap ia ki samla ba kin lah ban pynleit jingmut ha kane ka kam bad ruh ban klet noh ia ki jingsniew bapher bapher.

Ha kajuh ka por ka seng ka la pynpaw ruh halor ka jingdonkam ban buh ia ki deaddiction aftercare rehabilitation centre ia kaba na ka liang ka seng kan sa shimti na ka bynta ban wad jaka bad ruh ban pynsgewthuh sha ki shnong ki thaw ba kin pdiang sngewbha.

Shuh shuh shuh na ka liang ka KSU ka pan ruh ia ka jingiatreilang ryngkat jong ki paidbah nongshong shnong kumjuh ka sorkar sorkar bad ki kynhun seng bapher bapher ban lah rat dyngkhong ia une u jingdih ba shyrkhei. Kala kyntu ruh iaka sorkar ban ban pynkloi ban pynlong ain iaka Drug Reduction Elimination and Action Mission (DREAM) draft policy.