Ryngkat ki jingbthah wer ka Seng Khasi sha ka Kiew Pyneh Rngiew kaba 25

Syllad | The Rising MeghalayaJanuary 31, 2024

Ka Seng Khasi Kmie lyngba ka Lum Sohpetbneng Committee ka la iaid shakhmat ia ka jingpynkhreh ia ka Kiew Pyneh Rngiew kaba 25 sien, kaba ha kane ka kynti kaba mynta kan long ha ka 4 tarik u Rymphang 2024.

Kumta haba iadei bad kane Kiew Pyneh Rngiew kaba 25, ka Lum Sohpetbneng Committee ka kwah ba kan ia sam bad ban pathai lem ia ka khubor sha u paid Khasi baïar ka bri u Hynñiewtrep Hynñiew-skum Hynñiaw Wasa ia ki jingbthah, ki jingpynbeit bad ruh ia ki adong adit, khnang ba ka Kiew Eh Rngiew paidbah ha katei ka sngi kan da long kaba iaid beit kaba iaid ryntih.

Haba iakren bad u Rgh D.L Nongbri vice president Seng Khasi Kmie bad u dkhot jong ka Lum Sohpetbeng Committee, u pyntip ba ka nguh ka dem na khyrdop u Lum Sohpetbenng kan sdang naduh dang step phyrngap, kaba hangne ka jingshah ia ki kali ban kiew arted lynti sha u lum ba kyntang yn khang haduh ka por 11 baje mynstep, katba ki paidbah kiba kwah ban mih noh pat hadien ba la dep ka nguh ka dem ka kiew pyneh rngiew kan dei naduh ka por 1 baje nohphai sngi.

Nalor katta u Rgh D.L Nongbri u ai ruh ia kane ka jingbthah ba kito kiba wan na ki thain ka ri lum Pnar kin wan lyngba ka surok bah Shillong By Pass, katba kiba wan na ki thain jong ka Ri Khasi Sepngi kum na ki thain ka Mairang, Nongstoiñ namar ka jingkhim bad maramot ia ka jingkieng ka Damsite, lada long kaba lah kine kin sngewbha ban wan na ki thain jong ka UCC Lad Umsaw.

Haba iadei bad ki jaka ban pynieng ia ki kali, u Rgh D.L Nongbri u pyntip ba ha kane ka kynti kaba mynta la pynkhreh janai ia kane bad kyntu ia ki para kur para kha ba kin sngewbha ba kin ia trei lang ryngkat bad ki nongiarap kam da kaba kin ngeit bad kohnguh ia ka jingbthah ia ki ban pynieng ia ki kali ha ki jaka kiba la dep ban pynkhreh.

Shuh shuh ha kane ka kynti kaba mynta, ka Lum Sohpetbneng Committee ka la dep ba kan shna kyrpang ruh ia ki basa ia ki briew kiba wan ban ia die sha die dud, ha kaba ka la kyntu ruh ia baroh ba kin da ia kynduh bad kynjoh ktien ia ki dkhot ka komiti, lait nangta yn nym shah pat iano iano ruh ban shna basa ne sher dara ha ki rud surok ne lynti iaid jong ki paidbah bad lada don kiba leh pyrshah ka Komiti ka la rai ba kan weng  beit ia ki.

Ka jingkyntu ka long ruh ba ki paidbah kiba leit kiew Pyneh Rngiew ha kane ka sngi ba kin kiar ha kaba sliew ne thang ding, ban ri bad sumar kyndong ia ki sawdong sawkun ban nym bret pathar ia ki song jingbam.

Haba iadei bad ka jingsam ia u khaw eh u khaw khien bad kumjuh ia ka um ksiar ka um rupa, mynta ka kynti ka la don ka jingpynbeit kaba kyrpang khamtam lei lei ha ka por ban kiew ha duwan ban nguh ban dem, ba la kyntu bad kyrpad ia baroh ba kin bud bad ngeit ia ki kyndon bad jingbthah jong ki nongpyniaid.