Sa 40 ki seat pule MBBS yn Ioh ka Jylla ba ithuh ka Sorkar Pdeng ia ka PA Sangma Medical College

Syllad | The Rising MeghalayaOctober 3, 2024

Ka Myntri ka Tnad ka Koit ka Khiah ka Kong Ampareen Lyngdoh ha ka 3 tarik Risaw ka la pyntip ba ka Meghalaya ka la ioh biang sa 40 tylli ki seat na ka bynta ka jingpule MBBS hadien ka rai jong ka Sorkar Pdeng ban ai ka jingmynjur ia ka PA Sangma International Medical College of the University of Science and Technology, Meghalaya (USTM) kum ka Medical College shimet kaba nyngkong eh ha ka Jylla.

Haba kren sha ki lad pathai khubor, ka Kong Ampareen ka la ong, “U Myntri Rangbah ka Jylla u Conrad K Sangma u la ai khublei ia ka (USTM) halor kane ka jingjop ha kaba yn sdang ia ka Medical College kaba nyngkong eh ha ka Jylla hapoh ka Institute jong ka. Ngi ruh ngi sngewkmen shibun ban ioh ia kane ka jingtip mynta ka sngi ba sa 40 tylli ki seat pule MBBS mynta kin dei ki open seat ia ki samla pule ka Meghalaya kiba kwah ban pule MBBS.”

“Na ki 40 tylli ki seat, 20 tylli kin hap hapoh ka scholarship ba pura katba 20 tylli ki seat ha k jingsiew kaba mar shiteng. Ngi ai khublei ia ka USTM bad ngi kyrmen ba ki samla pule ka Meghalaya kin ioh jingmyntoi shibun na kane ka kabu kaba khraw,” ka la bynrap.

Haba pyntip ba ka snem pule 2024-25 ka la sdang, ka Myntri ka la ong, “Ngin sa don la ka jong ka jingpynbna ia kane namar kane k jingpynbna ia kine ki seat ka dang shu wan sha ngi.Ngin sa pyntip paidbah lyngba ki lynti kiba dei bad ki jingpynbna ha kine ki khyndiat sngi ki ban wan.”

Katkum ka jingpynpaw ka jong ka, ka Myntri ka la ong  ba ka Medical seat baroh lang na ka bynta ka Meghalaya mynta ka la kiew sha ka 133 tylli, ha kaba 93 tylli la ai na ka liang ka Sorkar Pdeng.

Kane ka College (USTM) ka la ioh jingbit ban pdiang haduh 150 ngut ki samla pule ha ka shi snem. Mynta ka dang ap ia ka jingbit na ka National Medical Commission (NMC).

Haba kylli, ka Myntri ka la ong, “Nga la leit jngoh ia ka institute bad nga sngew ba ki la long kiba la pynkhreh. Baroh ki jingdonkam naduh ki jingtei na ka bynta ka snem 1, 2 bad 3 katkum ka jingdawa jong ka NMC, nga tharai la dep ban shna. Phin nym ioh ia ka NOC lada phim don ia ki jingdonkam shwa ban sdang ia ka Medical College.”

Ha kaba iadei bad ka jingkyrpad ka USTM ban pynioh ia ka ram kaba T.200 klur ban lah pyntrei ia baroh ki jingtei bad ban buh ia kia jaka sumar ba 400 jingthiah, ka Myntri kala ong “Ngi la tyrwa ia kane. Ngim pat lah ban pynbeit ia ka lynti kumno ban leh hynrei ka kam kala iaid shakhmat”.