Sa 5 snem pynjlan biang ka Sorkar Pdeng ia ka jingkhein beain ia ka HNLC

Syllad | The Rising MeghalayaNovember 15, 2024

Ka Sorkar Pdeng ha ka 14 tarik u Naiwieng ka la pynjlan biang ha kaba iadei bad ka jingkhein beain ia ka seng kieng atiar Hynniewtrep National Liberation Council (HNLC) sa na ka bynta san snem kynthih.

Katkum ka jingpynbna ba la pynmih da ka Home Affairs (MHA) ka la ong, “Ka Sorkar Pdeng haba khmih ia ki kam beain ba la kdew haneng bad halor ki kam beain kiba la leh ha ki snem kiba la leit noh da ka HNLC, kumta ruh ka don ka jingsngew kaba donkam ban pynbna ba ka HNLC ha ryngkat ki tnad jong ka kum ka kynhun kaba beain, bad kane kan treikam mardor katkum ka bor ba la pynkup ha ki kyndon sub-section (3) jong ka section 3 jong katei ka Ain. Kumta la bthah ba kane ka jingpynbna paidbah kan long halor ia kano kano ka hukum ia kaba lah ban pynmih lyngba ka section 4 jong katei ka ain bad kan treikam noh mardor naduh ka 16 tarik u Naiwieng 2024 na ka bynta san snem kynthih.

Ka MHA ka la ong ba ka HNLC ha ryngkat baroh ki tnat jong ka baroh ha Meghalaya ki la donkti ha ki kam bymman kiba ktah ia ka ia ka nongrim jong ka synshar khadar jong ka ri India.

Ka la ong ruh ba ka Sorkar Pdeng ka don ia ka jingsngew ba ka HNLC ka la pynbna ia ka jingthmu ban pynioh laitluid ia ki jaka ka Jylla Meghalaya kaba bun ki nongshong shnong kiba dei ki riewlum Khasi bad Jaintia na ka India, bad ka la bteng ban leh ia ki kam pyntriem bad ki kam pynsyier ia ki paidbah nongshong shnong da ki kam dawa pisa na ka bynta ki kam jong ka seng ka jong ki.

Nalor kata ka Ministry ka la pynpaw ruh ba ka HNLC ka la pynneh ia ka jingiadei bad kiwei pat ki kynhun kieng atiar jong ka thain Shatei Lammihngi na ka bynta ban pyniaid shakhmat ia ki kam dawa pisa bad ki kam pyntieng pynsmiej bad ka la donkti ruh ha ki 48 tylli ki kam bymman, kaba kynthup ia kiba buntylli ki jingpynbthei bom ne ki jingpynap bom ha kylleng ka jylla Meghalaya, kata naduh ka 16 tarik u Naiwieng 2019 haduh ka 30 tarik u Jylliew 2024. Ha kaba kum kane ka por, ki bor ba dei khmih ki la pyntip halor ka jingkem ia ki 73 ngut ki dkhot bad ka jingwan pyndem noh jong ki laingut ki dkhot jong ka.

Lah ban ong ba ka Sorkar Meghalaya ruh ka la aijingmut ban pynbna ia ka HNLC kum ka kynhun kaba beain hapoh ki kyndon jong ka Unlawful Activities (Prevention) Act, 1967.