Sa 6 ngut ki kyrtong pynbna ka NPP sha ka election MDC na JHADC

Syllad | The Rising MeghalayaDecember 24, 2024

Ka seng National People’s Party (NPP) ha ka 23 tarik Nohprah ka la pynbna biang ia ka thup kyrteng kaba ar  jong ki hynriew ngut ki kyrtong ki ban mih ia aireng ha kane ka elekshon MDC na Jaintia Hills Autonomous District Council (JHADC) ka ban long ha ka 21 tarik u Rymphang u snem ban wan.

Kine ki hynriew ngut ki kyrtong ki kynthup ia u Bah Remdorkupar Lyngdoh na 13- Saphai, u Bah Warmanship Shadap na 14- Mowkaiaw, u Dr. Dachemlok Isniaw Kjam na Jowai North, u MDC ba mynta u Bah Krison Langstang na 26 -Sumer kumjuh u MDC ba mynta u Arbor Hima Darnei na 27-Saipung Nongkhlieh bad u Bah Daiapherbha Lamare na Narpuh constituency.

Na ki 29 tylli ki constituency sha ka JHADC ka seng NPP ka la dep ban pynbna ia ka thup kyrteng kaba nyngkong jong ki 20 ngut ki kyrtong ha ka 6 tarik Nohprah bad kan dang pynbna satang na ki laitylli ki constituency kiba dang sah, kata na 20- Muthlong Sohkymphor, 21- Tuber Wapungshnong bad 23 Rymbai Khliehriat.

Ki kyrteng jong ki kyrtong ka NPP ba la pynbna ha ka thup kaba nyngkong ki kynthup ia u Chief Executive Member (CEM) ka JHADC u Ma Thombor Shiwat na Modop Umladang,  Chairman JHADC u Dr. Sankey Shangpung na  Bataw Lakadong, u Holando Lamin na War Central, Het Pohthmi na War West, Lakhon Dkhar na Amwi-Khliehtyrshi, Ailad Bhoi na Mukhla-Ummulong, Jesse Suiam na Moodymmai-Nongkhroh, Eveningstar Teron na Mynso-Nongjngi, Rudaioo Tang na Shilliang Myntang, Aiborlang Shadap na Barato-Mukroh, Phasmon Dkhar na Musniang-Rngad bad u Bah Hambertus Nongtdu na Sutnga-Nongkhlieh.