Sa 9 sngi ioh por ka NHAI ban maramot iaka surok NH 6 ne mad iaka jingiakhih ong ka KSU

Syllad | The Rising MeghalayaSeptember 15, 2023

Ka Khasi Students’ Union (KSU), East Jaintia Hills District Unit haka jingialang kaba long haka 14 tarik Nailur ha Khliehriat kala maham ban thiah ha surok bad ka NHAI kan ioh por sa 9 sngi ban maramot iaka surok bah National Highway 6 (NH-6).

U president ka KSU, East Jaintia Hills u ma Stremly N Suchen ula ong “Ngi la shim ia kane ka rai da ka jingsngewkhia halor ka jinglong jingman ka surok bah hadien ba ka NHAI kam patiaw ne sngap ia ka jingdawa ka seng ha ka wat ba nyngkong jong ka jingiakhih ha khmat Tollgate ha Lumshnong mynha ka 08/08/2023.”

U Manager Technical jong ka NHAI u Biswa Jyoti Lahkar u la kular ban pyndep ia ka jingmarmot ia ka surok hapoh ka 6 taïew kaba mut un sdang naduh ka 09/08/2023, hynrei kata ka 6 taïew ka la jan kut, hynrei ym don dak eiei. Kane ka jingkular ka jong ka dei hakhmat ki nongialam shnong ka Narpuh bad ki nongialam bad dkhot ka KSU Narpuh.

Dang ha kine ki khyndait sngi ka KSU kala hiar shaduh Ratachera ban jurip, la lap pynban ba ka surok kala nangjot nangjot katba nangmih ki sngi kaba la pynlehraiñ ia ka sorkar jylla ha khmat ki 4 tylli ki jylla ka thaiñ shatei lam mihngi kum ka Mizoram, Tripura, Manipur bad Assam.

Ka KSU ka khot ka wer ia ki paidbah nongshong shnong ka East Jaiñtia Hills District baroh kawei bad ia kiwei kiwei ki paralok sengbhalang, ban wan ban ia snoh kti lang ha kane ka jingiakhih paidbah, kaba ka KSU kala rai ban thiah hapdeng ka surok naduh ka 25 Nailur. Kane ka jingiakhih kan bteng shitaiew lynter la byrthen ka KSU.