Sa artylli ki Degree College yn wanrah ka sorkar ha EJH bad WKH: Rakkam

Syllad | The Rising MeghalayaJanuary 24, 2025

U Myntri ka Tnad pule puthi ka Jylla u Rakkam A Sangma ha ka 24 tarik Kyllalyngkot u la pynbna ia ka rai jong ka sorkar ban wanrah sa artylli ki Degree College hapoh ka Jylla hapoh une u snem pule ba mynta.

Haba kren sha ki lad pathai khubor, u Rakkam u la ong ba ia kane ka jingtyrwa la dep ban mynjur ruh da ka Tnad kaba dei khmih.

“Ia kine ki artylli ki Degree College yn wanrah hapoh East Jaintia Hills bad ha West Khasi Hills,” u la bynrap.

Nalor kata u Myntri u pyntip ruh ba ka Tnad pule puthi ka la dep ruh ban pynkhreh ia ka jingpynbna na ka bynta ka jingthung kam ia plat 100 ngut ki nonghikai na ka bynta kine ki artylli ki College.

Haba kylla, une u Myntri u la ong ba ia ka Patharkhmah Degree College bad ka Rongjeng Degree College yn sdang noh ia ka jingshakri hapoh une u snem pule bad bynrap ba mynta ka Mawphlang Commerce and Science College ruh kan sdang noh naduh une u snem pule.

Da kaba pynpaw ba ka Tnad pule puthi ka la iakynduh ia shibun ki jingeh ha kine ki 40-50 tylli ki snem kiba la leit noh, u Rakkam u la ong, “Ngi dei ka jylla kaba bun eh ki skul, ki nonghikai haba ia nujor bad kiwei pat ki jylla hapoh ka ri.Ngi dei ruh kiba don bun eh ia ki jait nonghikai ha ki kyrdan bapher bapher.”

“Ngi duna ha ka jingdon ia ki jingtei bad ki jaka pule kiba biang, hynrei hapoh ka jingialam jong u Myntri Rangbah ka Jylla u Conrad K Sangma ngi lah sdang ban wanrah ia ki jingkylla.”

“Tang ha kine ki san snem ba la dep jong ka sorkar MDA hapoh ka jingialam jong u Myntri Rangbah ngi la lah ban shna ia ki jingtei kiba thymmai jong ki College, na ka bynta ki Secondary School, ki Primary School bad kiwei kiwei ki jaka pule, kata la ki dei ki Polytechnic, ITI bad kiwei kiwei,” ula bynrap.

Ha kajuh ka por, u Myntri u pyntip ruh ba ka Tnad kan sa pynmih ia ka jingpynbna  mynta lane lashai ka sngi na ka bynta ka jingthung kam ha ki skul Government Lower Primary.