Sa shibnai kan shim por ban pynjlih iaka aiñ Khasi Social Custom of Clan Administration: BM Lanong

Syllad | The Rising MeghalayaJanuary 28, 2022

Ka jingpynkhreh ne pynbit pynbiang ia ka Khasi Hills Autonomous District Council (Khasi Social Custom of Clan Administration) Bill 2020, kan bam por sa tang kumba shi bnai, naka bynta ban ioh ban phah biang pat ia ka sha ka executive committee jong ka KHADC.

Ia kane la iathuh da u Chairman jong ka advisory Committee on Law and Traditional Affairs, ka KHADC u bah BM Lanong haka sngi Thohdieng.

U Bah Bindo u la iathuh ba ka executive committee ka KHADC ka la phah ia kane ka bill ne ka ain rew sha kane ka komiti ha kaba ki dkhot ha kane komiti nalor u bah Bindo kum u Chairman, ki non official members ki long bah Teinwell Dkhar, MDC, Lamphrang Blah MDC, Macmilan Byrsat MLA, Robertjune Kharjahrin Legal Advicer bad kiwei kiwei.

Hadien ba la aiti da ka executive committee, u bah Bindo u la iathuh ba kane ka komiti ka la dep ba kan ia shong naka bynta ban ia thir iatai sani bha halor kane ka ain rew mynjta la jan dap artad shi snem shiteng.

Mynta pat ka sngi, kane ka komiti ka la ioh ba kan lum ia ka jingialang kaba la don bynta lang ruh a kumba lai saw tylli ki kynhun, kum na ka liang ki dlkhot nongmihkhmat jong ka Seng Khasi Kmie, ka HYC Sohiong Circle, Kur Kharshiing bad ki dkhot ka Syngkhong Rympei Thymmai, ha kaba la ioh ban ia syllok ne ban ia mir jingmut halor kane bill.

U Bah Bindo u lakam ba ha ka jingshisha, kane ka kam ka la poi artad sha kaba kut, tangba kan dang shim por sa hapoh shi bnai eiei naka bynta ban pynjlih pynbit pynbiang kiei kiei baroh khnang ban ioh ban phah kylla biang pat sha ka executive committee ba kan pyntreikam noh ia kane ka ain rew ne ka bill shwa ban pynlong ain ia ka.

U bah Bindo u ong ba u sngewtynnad shibun namar ka jingioh ban ia kynduh ia ki nongai dorkhat kiba la ai ia ki kato katne ki jingthoh ban ai jingmut, ha kaba don ki jingai jingmut kiba la ia pdiang  bad don ruh pat kiba la hap ban kyntait.

Haba kylli haduh katno tylli ki jingai jingmut, ba ka KHADC ka la ioh ba kan pdiang hadien ba ka la dep ba kan pynbna iar ia ka jingthmu ban pynthymmai ia kane ka bill, U Bah Bindo, u la ong ba kiba la wan shakhmat ban ia ai jingmut halor kane ka ain rew ki long tang kum ka Seng Khasi Kmie, ka Kur Kharshiing, HYC Sohiong, Syngkhong Rympei Thymmai.

Ia kane ka Bill dei kaba la thaw da ka executive committee kaba hadien ba ka la dep ba kan thaw ka la sngew donkam ba kan da thung ia ka komiti naduh u snem 2018-19 bad dei tad ha u snem 2020 ba kane ka komiti ka la ioh ba kan ia shong pyrkhat halor jong kane ka ain rew, tangba u bah Bindo u la ong ba ka kam pat ka long kaba khia kaba dei ban da ia syllok janai bad ka bym dei ka kam kaban shu leh kyrkieh, hynrei kan shong shibun eh ynda haba ka la phai biang sha ka district council ne ha ka dobar jong ki MDC baroh.