Sa u Sohniamtra Narwan la shalan sha Dubai

Syllad | The Rising MeghalayaDecember 16, 2023

Haduh 2 Metric Ton u Sohniamtra (Khasi Mandarin) na ka shnong Narwan la pynkit sha sorbah Dubai United Arab Emirates.

Ia kane la pyntip da ka Kong Santa Mary Shylla, MLA ka Sutnga Saipung Constituency haka 15 tarik Nohprah. Kala pyntip ba hadien bala song bad jied iaka jingheh jingrit u soh yn pynkit sha Mumbai ban shalan pat sha UAE.

Ka shnong Narwan ka dei ka shnong kaba jngai tang katto katne kilometre na Khliehriat ba u soh ba mih na kane ka shnong u dei uba la bna nam ha kylleng ka rilum Khasi Jaintia. Ka dei ka shnong kaba ioh jingithuh bad shah pynkup burom teng haka sorkar lyngba ka tnad kam rep kam riang ha ki phew snem mynshwa. U Sohniamtra ba mih na kane ka shnong u dei uba lah ban ioh khamslem ha iew haduh u bnai Rymphang-Lber hadien bala lut u soh Nongjrong (East Khasi Hills).

Poi u Sohniamtra na Jylla ha Dubai ha iew LuLu Hypermarket

Ka Narwan ka dei ka shnong kaba la khang pyrshah ban tih dewiong shuwa ban wan ka NGT hadien ba kala sngewthuh iaka jingma bad sdang iaka jingrep Sohniamtra. Nalor u Sohniamtra ha kane ka shnong la sdang ruh ban rep iaka Slasha.

Dangshen, ka Myntri Agriculture and Farmers’ Welfare, Dr. Mazel Ampareen Lyngdoh haka 11 tarik Nohprah kala pyllait paidbah ia u Sohniamtra ban shalan sha Dubai haka jingialang kaba long ha Integrated Agriculture Training Centre (I.A.T.C), Upper Shillong. Une u Sohniamtra ban shalan sha Dubai u don haduh 20 Metric Ton uba pynmih na ki kylleng ki shnong ha Ri Khasi Jaintia bad Garo Hills.

Knieh ki nongrep Soh Trun ka jylla Meghalaya wat ia  ki iew bar ri

Ka jingshalan ia u Sohniamtra sha UAE kala wan urlong daka jingiatrelang ka sorkar Meghalaya, APEDA, Lulu Group bad ka Ministry of Agriculture and Farmers’ Welfare. Baroh ka jinglut jingsep la aiti sha ki FPOs kaba kynthup lang iaka bai kit, bai synduk.