Sah um dum u paidbah, ka sorkar ruh kam shym la pynbna bala kyntiew kyrdan iaka Namdong PHC ong ka KSU

Syllad | The Rising MeghalayaJuly 1, 2020

Ka KSU Namdong Unit kala pynpaw iaka jingkyndit ban iohi ia katei ka khubor namar katkum ka jingbuddien ka KSU kala lap ba ka PHC Namdong haduh mynta ka sngi ym shym pat la lah pynbna ba la pynkiew kyrdan iaka shaka kyrdan CHC. “Kumno la kam ba lah dep pynkiew kyrdan iaka PHC Namdong haba ka jingtreikam ka dang long kumjuh hi kumba mynshwa bad wat iaka jingdon ki Nongtrei ruh la lap ba ym pat iahap kyrdan ban ong ba kadei ka CHC ” la ong u Chanbor War President ka KSU Namdong Unit.

“Ka Seng ka ai jingiaroh iaka Mynsngat-Khanduli Development Committe bad kumjuh ruh ia u Local MLA halor ka jingshimkhia ka jong ki ban buddien iaka jingdawa kyntiew kyrdan iaka PHC Namdong sha ka CHC, hynrei kim dei ban kmen tohhoh ia kane ka jingkam ba ladep pynkiew kyrdan iakatei ka PHC, hynrei kidei ban peit bad bishar bniah shwa iaka jinglong jingman bad iaka jingtrei kam katei ka PHC” la ong shuh shuh ka KSU.

Kumba ka long mynta ki paidbah ka thain kim pat tip ba la dep kyntiew kyrdan iakatei ka PHC, wat naka liang ka sorkar ruh kam pat pynbna offcially ba lah dep pynkiew kyrdan iakatei ka PHC bad wat ka signboard kaba pyndonkam hakatei ka PHC ruh la pyndonkam daka kyrteng ka Namdong PHC hi ymdei Namdong CHC” la pynpaw ka KSU

“Ka jingdon ki nongtrei bad ka rukom ai jingsumar hakatei ka PHC ruh ka dang long kumjuh hi bad ympat iahap ruh ban kam ba lahdep pynkiew kyrdan shaka kyrdan ka CHC” la pynpaw u kyrwoh naka KSU.

“Hooid ym lah ban len ba ia u maw nongrim naka bynta ka jingthmu ban pynkiew kyrdan iakatei ka PHC lah dep ban plie naduh ka sorkar kaba rim kaba la ialam daka Seng Congress, hynrei ym shym pat pynbna pat ba lah pynkiew kyrdan iaka. Lada ka jingpynkiew kyrdan iaka PHC ka long kaba shisha kumba la kam , ngi pynpaw shisha ka jingkmen halor katei ka bynta, hynrei ngim hun pat ban shu kut tang haka jingthoh, hynrei ngi kwah ban iohi ba katei ka PHC kan treikam pura nadong shadong kum katei ka CHC kaba pura” ong u nongialam ka KSU Namdong.

Lah ban pynkynmaw ba kane ka ne ka mat ban pynkiew kyrdan iaka PHC ka la sdang ban khluit dei hadien ba ka Seng KSU Namdong Unit ka la mih shakhmat ban dawa ban kyntiew kyrdan iakatei ka PHC hakaba myn haka 24 tarik mynta u bnai. Ka KSU ka dang shu dep jurip iakatei ka PHC bad ka la dawa ruh lyngba ki lad pathai khubor ban pynkiew kyrdan iakatei ka PHC shaka kyrdan CHC.