Sah umdum ki paidbah ba iai kylla rong ka Wah Lukha, bynniaw ka KSU ba kuman ka sorkar ban tohkit

Syllad | The Rising MeghalayaDecember 18, 2020

Ka jingkylla rong blue ka Wah Lukha ka nangjur kat nangmih ki sngi, haba baroh kiba iaid lyngba u surok bah NH-6 ki sakhi ia kane. Kane ka jingkylla rong suiñ bneng kane ka wah kala jia biang mynta la shitaiew eiei.

Kiba bun kila buh jingkylli iano yn kynnoh halor kane ka jingkylla rong ba khah khah ka wah Lukha? Ka KSU Narpuh Circle kala pynpaw ba ka sah haka umdum bad kam peiphang shuh halor ki ei ki daw ba kylla rong ka wah baroh shilynter.

Ha ka por ba khangdam na ka bynta ban iakhun pyrshah iaka khlam COVID-19 ha u bnai Lber kane ka um ka khuid bad hadien bala pyllait iaka jingkhang dam suki suki kala nang jur kane ka jingkylla rong kane ka wah.

Ka khubor naka KSU Narpuh ka ong “Ki nongtong bad ki nongkhwai dohkha kiba iathuh ba mynmiet ki leit ban tong dohkha namar ki dohkha ki jngi sharud (ryngkew) shaba jyndong ka um namar kim nud ban im ha jylliew. Kane ka la pynsuba ba kane ka um ka la long bih bad ki dohum kim lah shuh ban im ha jaka ba jylliew kumta ki phet sha ryngkew bad ki nongtong dohkha ki ioh ban kem ne tong da kaba suk.”

“Lada ka iai jia shi iai jia kumne manla u snem kan poi ka por ba ki dohum baroh kin duh noh bad yn sa sah tang ka khana sah kynmaw ia kane ka wah,” la ong u S. Bamon General Secretary KSU Narpuh Circle.

Ha u bnai Iaiong (April) kane ka wah ka kylla rongblue, ki dohkha ki la iap bad ka KSU kala mudui da ka jingujor ejahar ha Lumshnong Police Station, hynrei haduh mynta ym ioh kaiphod eiei na ka tnad pulit.

Ha u snem 2012 ka KSU kala dawa na ka sorkar lyngba ka ophis u Deputy Commissioner ban pynlong ia ka jingtohkit ba laitluid (Independent Inquiry), hynrei ka sorkar kala leh kuman ia kane ka jingdawa.

Ka KSU ka pynrem jur ia kane ka jingpynjaboh ia ka wah lukha bad pynrem jur ruh ia ka tnad Ministry Environment, Forest kaba la sngap kuman halor ka jingiap da ki hajar ki dohkha ha kane ka wah naduh u snem 2007 bad pynrem jur ruh ia ka tnat MSPCB kaba sngap mynthi kaba shu leit tong um pyndep rukom  bad khlem leit ban wad ka jingshisha na tynrai nangno bad kumno kane ka wah ka kylla rong.

Mynta kane ka um ka don haka jingma kaba khraw khamtam iaki mrad ki mreng bad u briew uba pyndonkam ban sum bad sait namar ka jingkylla bih kane ka wah.

Ka KSU kala ong ba shen kan ai jingthoh biang sha ka bor shynshar district ban dawa iaka jingtohkit kaba laitluid.