Sahkut ka jingkyntiew kyrdan iaka Namdong PHC, ia kynduh u MDC ia u Myntri Koit Khiah

Syllad | The Rising MeghalayaSeptember 4, 2020

U MDC ka Mynsngat Khanduli, Ma Dawan Lyngdoh ha ryngkat u Waheh Shnong Mobakhon Ma P Dkhar haka sngi Thohdieng kila leit ban iakynduh bad ai dorkhat ia u Myntri ka tnad ka Koit ka Khiah Bah AL Hek halor ka jingsahkut ka jingthmu kyntiew kyrdan iaka Namdong PHC sha ka CHC.

Une u MDC ula pynkynmaw halor ki ba bun ki memorandum kiba ki Waheh Shnong, ki nongialam na ki synjuk waheh shnong bad ma u kum u MDC ki la phah sha ka tnad ka koit ka khiah lyngba MLA ka thain, uba long ruh u Myntri Sorkar ma Sniawbhalang Dhar bad sha ki myntri barim ka koit ka khiah naduh u snem 2015 na ka bynta ban pynbiang ia ki jingduna ka Namdong PHC bad ki sub centre ba don hapoh kane ka PHC kaba la wanrah iaka jingeh kaba bun ia ki paidbah ka thain.

U Bah AL Hek ula ong ba ka sorkar kala pynkhreh shait shait ban jied iaki PHC ban kyntiew kyrdan sha ka CHC. U ma ula kyrpad ia u myntri ban kynthup lang ia ka Namdong PHC namar ba ka por kala dawa bad ban pynbiang ruh ia ki jingduna ka PHC bad ki sub centre kiba hap ha Namdong PHC naduh ka light, ka um ki jaka ban thang ia ki tiar ba la dep pyndonkam bad kiwei kiwei.