Sahkut ka leit ka wan lyngba ka surok bah NH-6 namar ka pakhang surok ka JAC

Syllad | The Rising MeghalayaJune 20, 2024

Ka leit ka wan jong ki kali lyngba ka surok bah National Highway 6 ha East Jaintia Hills District ka la shah ktah jur naduh ka step jong ka 19 tarik Jylliew namar ka jingkhot pakhang surok ba khlem buh por da ka Joint Action Committee (JAC) jong ki khatwei tylli ki shnong kiba don ha ka lynter jong kane ka surok hapoh ka District.

Ka JAC ka la khot pynlong ia kane ka jingpakhang surok namar ka jingpulom jong ka Sorkar Meghalaya bad ka National Highway Authority of India (NHAI) ban maramot bad pynbha ia kane ka surok kaba la jot rathai naduh na ka shnong Tongseng shaduh Malidor.

Da ki spah ngut ki nongshong shnong ki la mih na la ki jong ki iing ki sem hapdeng ka jingther jong u slap ban pyntreikam ia kane ka pakhang surok namar ki la shim ba dei tang kane ka lynti kaba lah ban ksam ia ki shkor ba kyllut jong ki bor ba dei khmih.

Ha Umkiang bad Sonapyrdi, ki nongshong shnong ki la mih paidbah bad pynieng ruh da ka jingsher dara na ka bynta ban shet bam na ka bynta ki nongshong shnong kiba la wan iashim bynta ha kane ka jingiakhih.

Kane ka surok bah NH-6 lah ban shim ba ka dei kawei na ki surok bah kaba bunkam bha ha ka thain shatei lammihngi namar kane ka surok ka pyniasoh ia ka ka Jylla Tripura, Mizoram bad ki bynta jong ka Assam bad Manipur. Ki don bun bah ki trok kit mar na ka bynta ki jingtei, mar bam bad kiwei pat nalor ki bus kit paidbah bad ki kali rit bad kiwei pat kiba iaid lyngba kane ka surok.

Namar ka jingbteng ka jinghap slap kaba jur kaba la wanrah ia ki jingjia twa khyndew naduh kine ki khyndiat taiew ba la lah namar ka jingbun jong ki kali kiba leit ba wan kane ka surok kaba la sniew lypa ka la nangsniew shuh shuh.Ka bynta jong ka surok NH-6 ha Lumshnong EJH lah ban ong ba ka la shah pyndkut ha ka jingpyniasoh namar ka jingshah rat ha ka um.

Kine ki khatwei tylli ki shnong kiba don hapoh ka JAC ki kynthup ia ka  Ratacherra, Dona Umbluh, Dona Skul, Umkiang, Lumphyllut, Lumsoski, Pyrtakuna, Borsara, Kuliang, Shymplong bad Tongseng baroh kiba hap hapoh ka 6-Sutnga Saipung Assembly Constituency bad 1-Shillong Parliamentary Constituency.

Haba pynpaw ia ka jingbitar halor kane ka jinglong jingman jong kane ka surok, u Chairman ka JAC u Bah Lasting Pala u la ong ba kin ym pyndem da lei lei ruh tad haduh ba ka Sorkar bad ka NHAI kin pynurlong ia kane ka jingdawa ka jong ki bad ban sdang maramot bad pynbha noh ia kane ka surok NH-6 bad ka ban ym kut ruh tang ha ki jingthoh.

Nalor kata u la ong ruh ba kin ym iashim bynta ha kino kino ki jingialang bad kino kino ki party tad haduh ba ka sorkar bad ka NHAI kin shim ia ka rai ban maramot bad pynbha noh ia kane ka surok naduh Tongseng shaduh Malidor.

Ia kane ka rai ban pakhang ia kane ka surok bah NH-6 la shim lyngba ka jingai jingkyrshan ba pura ym tang da ki nongshong shnong jong ka thain, hynrei ruh na kiwei pat ki riew paidbah bad ki kynhun seng, ki nongialam shnong bad ki nongniah kali.