Sakhi ka Meghalaya ia ka jingwan bun eh ki nongthep vote LS Election, haduh 76.60%

Syllad | The Rising MeghalayaApril 20, 2024

Ka Jylla Meghalaya ka la sakhi halor ka jingwan poi bun eh jong ki nongwan thep vote ha kane ka Ilekshon Lok Sabha 2024 kaba la kut noh ha ka 19 tarik mynta u bnai kaba long haduh 76.60% ban jied ia ki nongmihmihkhmat kiba thymmai sha ki artylli ki Lok Sabha seat, kata na Shillong bad Tura

“Ka jingdon jong baroh ki nongwan thep vote ha ka Jylla ka long 76.60 percent,” ong u Chief Electoral Officer (CEO) u Dr BDR Tiwari ha ka 20 tarik Iaiong.

Ka percentage ka jingdon jong ki nongwan thep vote ka la kiew da 5.23 percent haba ia nujor bad ka Ilekshon Lok Sabha kaba la long ha u snem 2019, kaba long da 71.37 percent.

Kumba 22.26 lak ngut ki nongthep vote ki la pyndep ia ki hok ki jong ki ha ka jingiathep vote kaba la long ha ka 19 tarik mynta u bnai, ha kaba 11.27 lak ki dei ki kynthei bad 10.99 lak ki dei ki shynrang.

Ka jingdon jong ki kynthei kiba wan thep vote ka long 78.62 percent kaba kham heh haba ianujor bad ki shynrang kaba long da 74.53 percent.

U Tiwari u la ong ba ka  jingdon jong ki nongwan thep vote na ka bynta ka Tura parliamentary constituency ka long haduh 81.37 %, katba ka Shillong parliamentary constituency  ka long tang 73.78%.

Ka assembly segment kaba hap hapoh Shillong Constituency bad kaba don bun eh kiba wan thep vote ka dei ka Ranikor ha South West Khasi Hills, kata da haduh 80.55 percent katba kaba duna tam ka dei ka South Shillong kba long tang 58.36 percent.

Katba ha kaba iadei ba ka Tura constitunecy, ka Rajabala ka la sakhi ia ka jingdon bun eh ki nongwan thep vote kaba long haduh 87.85 % katba kaba duna tam ka dei ka South Tura da tang 69.60 %. Ka South Tura ka dei ka constituency ba la mihkhmat da u Myntri Rangbah ka Jylla u Conrad K Sangma.

Ha kawei pat ka bynta, u CEO u pyntip ba ka jingpahara ia baroh ki strong room ha ki 13 tylli ki centre hapoh ki khatar tylli ki district headquarter bad ka Sohra Civil Sub Division ka la long kaba biang pura.

Ka jingniew ia ki vote na ka bynta kane ka Ilekshon Lok Sabha kan long ha ka 4 tarik u bnai Jylliew 2024.