Sala Sorkar BJP ong u Bah Lambor risa u paidbah

Syllad | The Rising MeghalayaJanuary 30, 2019

SHILLONG: Ki paidbah kiba wan sha ka jingialang bala pynlong da ka Khasi Students Union ki la risa jam ha ka por ba ai jingkren u MLA na Nongkrem Konstituensi u Bah Lambor Malngiang uba la ther tyngeh ia BJP Sorkar da kaba ong “Sala Sorkar BJP.”

U la ong shuh shuh ha ka por ba ki leit iakynduh ia Home Minister jong ka Sorkar Kmie U Rajnath Singh ki khlem Namaste ne ai khublei ia u, hynrei ki la shu ong ia pyndam noh ia ka Citizenship Amendment Bill (CAB), 2016.

Kumban shu pynkynmaw hangne ba ia ka sorkar Meghalaya Democratic Alliance la thaw lang da ka NPP, ka BJP, ka UDP bad kiwei kiwei de ki parti bad MLA shimet.

U Bah Lambor u la ong kum shi bynta jong ka Forum la thaw ia ka subcommittee ban leit sha ki jylla bad don ki MP ha ka Rajya Sabha ban pan ka jingkyrshan jong ki ban pyrshah ia kane ka Bill.

Haba ther pyrshah ia kane ka Bill, u MLA ka Nongkrem uba bat ia ka shuki Chairman jong ka State Planning Board u la ong haba khot lyngkot ia kane ka Bill ka long CAB bad CAB ka mut ka taksi kaba kit briew na Iewduh sha Nongthymmai sha Jaiaw ter ter hynrei kane ka CAB pat kan kit ia ki briew na Bangladesh.