Sam jingbam tei met ka ophis District Tuberculosis sha ki nongpang TB ha East Jaintia Hills

Syllad | The Rising MeghalayaDecember 20, 2023

Da ka jingthmu ban ialap paidbah halor ka National Tuberculosis Elimination Programme  bad ka Pradhan Mantri TB Mukt Bharat Abhiyan (PMTBMBA) kaba dang shu pyllait shen, na ka liang ka ophis ka District Tuberculosis Officer, Jaintia Hills ha ryngkat ka jingiatreilang bad ka Star Cement Limited, Lumshnong lyngba ki sienjem CSR jong ka haka 20 tarik Nohprah, ki la pynlong da ka jingsam ia ki jingbam tei met shibynta jong ka Community Support Scheme sha ki nongpang TB ha ka prokram ba la pynlong ha Sutnga CHC, Sutnga ha kaba la ia don lang ruh ka District Tuberculosis Officer, Jaintia Hills, ka Dr. EBV Laloo, Medical Officer in-charge Sutnga CHC, Dr. R Toi, Manager-CSR, Star Cement Limited, Lumshnong,  Kingshok K Borah bad bun kiwei pat.

Ha ka jingkren ka Dr. EBV Laloo ka la kdew halor kiba bun ki sienjam kiba ki nongpang TB ki lah ban leh ha la ki jong ki iing ki sem ban khanglad ia ka jingsaphriang jong ka jingpang Tuberculosis sha kiwei pat ki dkhot ka longiing, kata da kaba kyntu ruh ia ki nongpang ba ki dei ban tista ha kaba dih ia ki dawai dashin kumba la bthah da ki doktor ne ki dkhot ka tnat ka koit ka khiah na ka bynta ka jingkoit jingkhiah bad ka bha ka miat ka jong ki.

Nalor kata ka la batai bniah ruh halor ki skhim bapher bapher kiba ai ia ki lad jingiarap pisa sha ki nongpang TB ha ka por ba ki dang don hapdeng ka jingshah sumar bad dih dawai.

Ka Dr. Laloo ka pynpaw ruh ka jingsngewnguh ia ki staff bad baroh ki bor pyniaid jong ka Star Cement Limited halor ka jingkyrshan ia ki marbam ia kiba la sam sha ki nongpang bad khot ruh ia ki nongialam shnong ba kin ai ka jingiatreilang bad ki ASHA kumjuh bad ki jaka aijingsumar na ka bynta ban lah ban rat dyngkhong ia kane ka jait jingpang ha ka imlang ka sahlang.

Ha kawei pat ka bynta, na ka liang u Manager-CSR, Star Cement Limited, Lumshnong, u Kingshok K. Borah u la kren ha kaba iadei bad ki nongpang TB da kaba iai ban ruh ba na ka laing ka Stat Cement ka don ia ka jingkut jingmut ban ai ia baroh ki lad jingiarap sha ki nongpang TB hapoh East Jaintia Hills District.

Kiwei pat kiba la aijingkren ha kane ka prokram ki kynthup ruh ia Medical Officer in-charge Sutnga CHC, Dr. R. Toi, Senior Tuberculosis Laboratory Supervisor (STLS), Bah Watson Siangshai bad Senior Treatment Supervisor (STS), Bah Linus Manner.

Hadien kane ka prokram la sam ia ki marbam kiba kynthup ia u khaw, umphniang, pylleng bad kiwei kiwei sha palat 30 ngut ki nongpang kiba la ia don ryngkat lang ha kane ka sngi.