Sam ka Dakti Craft ïa ki tiar ban pyndonkam ban thain thaw kti sha ki 15 ngut ha Mowkyndeng

Syllad | The Rising MeghalayaOctober 15, 2023

Kum shi bynta ban iarap iaki ha ka ban nangpynheh shuh shuh iaka kam thain, ka Dakti Craft, Shillong da ka jingkyrshan ka Meghalaya State Skill Development Society kaba hap hapoh ka tnat Labour ka Sorkar jylla haka 11 tarik Risaw, kala sam da ki tiar shna sha ki nongthain nongthaw kti (Tools Kit) sha ki 15 ngut ki nongthain kiba la pyndep iaka jinghikai naduh ka 20.05.2023 haduh 25-05-2023 ha Common Facility Centre ka Women’s Group & Handicraft Multipurpose Cooperative Society Ltd, Madankynsaw-Mowkyndeng.

Ka Dakti Craft Shillong kadei ka seng kaba pynmih iaki tiar shna kti bad ki tiar kiba ka pynmih kidei kiba la shna da u skhen ki siej, khyndew, rimet bad ki jait ksai khlem da pyndonkam plastic.

Shwa ban sam iaki tiar jingiarap, ka la don ka jingialang ha CFC, Madankynsaw-Mowkyndeng haka jingdonlang ka kongsan ka Kong SE Kharpran, Functional Manager,

u Namphrang Diengdoh, Training Manager, Dakti Craft, Shillong, u Peter Sutnga, Asst Waheh shnong, ka Isabella Pakma, Secretary Women’s Group & HMPCS Ltd, u Lambormi Suchen, Skill Development Officer, West Jaintia Hills bad kiwei kiwei.

Ka kongsan ka Kong S.E Kharpran haka jingkren ka la kyntu iaki nongthain ban leh bha shuh shuh bad trei shitom kumjuh ban pyndonkam hok ia kane ka lad jingiarap bai oh na ka liang ka sorkar bad ka la pynkynmaw ba ka jingiatylli ka long kaba donkam khnang ban jop ia kino kino ki jingeh.

U Lambormi Suchen haka jingkren ula iaroh iaki tiar kiba la pynmih na ka Shnong Madankynsaw-Mowkyndeng kidei kiba bha bad ki paw ha kylleng ka ri bad ula pynkynmaw iaki nongthain ba ki tiar kiba ki pynmih ki poi wat shaduh sha Delhi da ka jingkyrshan lang ki tnat sorkar kum ha ka ban pyniaid iew nlorkata ula kitbok kitrwiang iaki ban bha ban miat ka trei ka ktah ka kamai kajih ka jong ki.