Sam khaw biang u MDC ka Musniang Rangad ha Pamrapaithlu

Syllad | The Rising MeghalayaJune 3, 2020

U MDC jong ka Musniang Rangad ma Phasmon Dkhar, ula kner la ka kti jingiarap jong u da kaba sam da u khaw haka shnong Pamrapaithlu sha ki 270 tylli ki longïing.

Ïa une u khaw ka dorbar shnong Pamrapaithlu hapoh ka jingialam u Waheh Shnong ma Leningstar Rymbai kala sam sha baroh ki longiing mar 10 Kg shiiing.

U waheh Shnong ka Pamrapaithlu U Ma Leningstar Rymbai u la ong ba kane kadei ka sien kaba ar haba U MDC ula noh synniang da u khaw sha ki nongshong shnong jong ka Pamrapaithlu.

Ka Dorbar Shnong kala ai khublei ia U MDC halor ka jingiohi jong u ia ka jingeh jong ki nongshong shnong haba iadei bad ka jingkyrduh bad jynjar bam ha kum kine ki por ba ka Sorkar ka la khang dam ne lockdown ban iakhun iaka jingsaphriang u khniang jingpang ba la tip kum U COVID-19.

Ka shnong ka kitbok kitrwiang ia u MDC ma Phasmon Dkhar ba un nang lah ban shakri ia u paidbah kum u nongmihkhmat bad ban iarap ia uba duk ba suk haka eh ka shon jong ki.