Sam mar bam ka Dorbar Shnong Tympang sha ki 41 tylli ki longing ba kyrduh bam

Syllad | The Rising MeghalayaApril 9, 2020

Ka Dorbar Shnong Tympang Iawmusiang hapoh ka jingialam u Waheh Shnong ma Edystone Shylla kila leit ban sam mar bam sha ki 41 tylli ki longing ha ka dong Shahtngit, ka dong kaba hap hapoh u pud u sam ka Iawmuisiang mynta ka sngi.

U Ma Edystone Shylla kum u Waheh Shnong hadien ba ula ïoh jingtip ba bun tylli ki longïing kiba don ha katei ka dong kila kyrduh marbam mardih, kum ka shnong kala rai leit nohsynniang da ki mar bam sha ki tei ki longïing. Kine ki mar bam kiba la sam ki kynthup naduh u khaw, phan, jhur bad kiwei kiwei ki mar bam khnang ba kin lait naka jingshah thngan.

U Ma Edystone ula ong ba kine ki longïing kila shah ktah bha hadien ba kim ïoh shuh ka lad ban leit bylla bad ban trei ban ktah naka jingkhang khyrdep ne lockdown ha baroh kawei ka ri ban iakhun iaka khlam COVID-19.

Ula ong ruh ba ka bor shnong kaba peit iaka bha ka miat ka shnong ka hap ban shim ia kane ka sienjam namar kam kwah ban iohi ban mih kino kino ki jingjia ba sngewsih. Ula kyntu ba lada don kino kino ki longïing kiba shah ktah haka jingduna bam ban wan mih sha ophis ka shnong, khnang ba ka shnong kan wad ki lad ki lynti ban iarap ha kum kane ka por ka khim ka khait.