Sam marbam ka HYC Narpuh sha ki 63 tylli ki longïing

Syllad | The Rising MeghalayaJune 13, 2021

Ka Hynñiewtrep Youth Council (HYC), Narpuh Circle kala synñiang da u khaw, phan bad u dai shaki 63 tylli ki longing jong ka shnong Chiehruphi, Mynkre bad Tongseng.

Ia kine ki mar bam ka HYC kala sam haka sngi Saitjain ha ka jingialang bala pynïaid da u publicity secretary u Pyndap Syiemlieh

La sam ia u khaw mar 12 kg kawei ka longing bad ïa u phan la sam 3 kilo shi ïing.

U Secretary shnong Chiehruphi u Dametreyo Rymbai, u Secretary shnong Mynkre u Sani Bareh bad Secretary shnong Tongseng Saman Phniaw kila pynsngew ka jingsngew nguh ïaka HYC bad kitbok kitrwiang ba kan nanglah ban kner ki lad jingïarap sha ki longïing ba duna ka ïoh ka kot khamtam hakum kane ka por ba don ka jingkhangdam ki shnong ki thaw ban ïakhun ïaka khlam jingpang.

Ka HYC ka ai khublei kyrpang ruh ia i longkmie na ka shnong Chiehruphi ka kong Sunamon Chadong iba la kloi ban synniang lang bad ka seng da kaba iarap 2 byrni u khaw.