Sam marbam ka Khooid Ya Ka Wah Myntdu bad ka Seva Bharati sha ki ASHA ha Jowai

Syllad | The Rising MeghalayaJune 13, 2021

Ka Sein Khooid Ya Ka Wah Myntdu ryngkat ka jingiatreilang bad ka Seva Bharati Meghalaya, Jaintia Hills haka 12 tarik Jylliew kila sam ia ki marbam (Dry Ration) sha ki 19 ngut ki ASHA ka shnong Jowai kiba len lade ban ai ka jingshakri sha ki paidbah ha kum kane ka por jong ka jingtynjuh na ka jingpang khlam Covid-19.

Ia kane ka jingialang la pynlong ha ïungwalieh ka Loomkyrwiang ha kaba la pyniaid da u Khroo Lamsalanki Pariat, President  Ka Sein Khooid Ya Ka Wah Myntdu ryngkat ka jingiadonlang u Hamewan Laloo, Waheh Chnong Loomkyrwiang, u D. Dkhar, Secretary Seva Bharati Meghalaya, Jaintia Hills, u Orilan Shylla, Treasurer Ka Sein Khooid Ya Ka Wah Myntdu bad ki ASHA.

U Khroo Lamsalanki Pariat haba kren maitphang u pynpaw ka jingsngewnguh iaki ASHA kiba la buh hakhmat ia ka jingshakri na ka bynta ki paidbah nongshongshnong khlem da pyrkhat ia ka jingsiew barit ba ka sorkar ka ai na ka bynta jongki kaba shisien pyrkhat kam iahap shuh bad ka kam ba ki trei ha kum kane ka por jong ka jingtynjuh u khniang jingpang Covid-19. Kumta ka Seng  Khooid Ya ka Wah Myntdu ryngkat ka Seva Bharati, Jaintia Hills da ka jingsngewkhia ia ki ASHA kiba hap ban mad ia ka jingtynjuh na ka daw jong ka jingbymioh tikna ia ka jingsiew ne ka bainong ba ki la trei  ha kum kane ka por, ki la shim ban iarap da ki marbam katba kot la I bor ba long ruh kum shibynta ban ai mynsiem ia ki ASHA.

Kiwei de kiba la kren ha kane  ka jingialang ki long u D.Dkhar, Secretary Seva Bharati Meghalaya, Jaintia Hills, ka President Ki ASHA West Jaintia Hills, u Hamewan Laloo, Waheh Chnong Loomkyrwiang bad u Orilan Shylla, Treasurer Ka Sein Khooid Ya Ka Wah Myntdu.