Sam marbam ka TULBA & Axis Bank ha Mawlai Umsaw Mawjynrong

Syllad | The Rising MeghalayaMay 30, 2020

Ka The Ultimate Legend Bikers Association (TULBA) ryngkat ka jingiatreilang Axis Bank daka mynsiem sngewkhia ki la kner laka kti jingiarap da kaba sam da ki marbam sha ki longiing kiba shah ktah haka lockdown

Kine ki longiing kiba ïoh myntoi kila kot haduh 70 tnum iing naka shnong Mawlai Umsaw Mawjynrong.

Ia kine ki marbam ka TULBA bad ka Axis Bank ki la leit ban synniang haka sngi Thohdieng.

Hashwa ban aiti iaki marbam, ka la don ka jingialang ba la pyniaid da u Vice President u Splendour Sawkmie, ki jingkren na u Seiborlang L Nonglait President seng kmie.

U Bah Seiborlang L Nonglait haka jingkren ula ong ba ka jingwan pur ka khlam Corona virus ne COVID-19 ka la ktah shisha iaka Jylla Meghalaya bad iaka pyrthei hi baroh kawei. Kane ka jingpang khlam ka la pynsheptieng haduh katta katta iaki paidbah ka Jylla kumjuh ki ri ka pyrthei bad ka jingpang kala shim iaka jingim briew kaba la kot da ki lak ngut.

Mynta la kynjoh 2 bnai tam ba ka India ka la mad haka jingkhang dam ne (Lockdown) ban tem ïaka jingpur ka khlam, hynrei kala ktah jur ia u paidbah khamtam ia kiba duk kiba im jakpoh da kaba kamai bylla sngi namar ka jingbym ioh lad ban leit kamai ne bylla sngi bad kane ka la kylla pynban ka jingeh ha man ki longing longsem bad mad iaki jingkyrduh, la ong u Bah Seibor.

Ula pynpaw bad ainguh nyngkong eh ia U Blei namar ba ka mynsiem tip briew tip Blei, ka mynsiem ia ieid ne jingiatip lem ka dang im haka imlang sahlang bad ha jaitbynriew bad la iatreilang bad ka sorkar ban tem ïaka jingpur ka khlam.

“Ngi da ainguh shisha ia U Trai Kynrad u ba la kyrkhu iaki paid nongshong shnong jong ka Jylla bad kiba ioh ia kane ka jingpang ki don tang khyndiat ngut ym kum kiwei ki Jylla,” ong u Bah Seibor.

Ula iaroh iaka sorkar kumjuh ki Dorbar Shnong, ki kynhun sengbhalang, ki balang, ki riew shimet kiba la shim khia ban iatreilang ban iakhun pyrshah iaka khlam COVID- 19.

Ula kyntu ia baroh ki paid nongshong shnong ban long kiba husiar bad kiba phikir ialade bad ruh ban kohnguh iaki bor pyniaid Shnong bad ban bud ryntih iaki jingbthah jong ka tnad ka koit ka khiah kiba long ka lynti ba lah ban iakhun bad pynduh jait shi syndon iaka khlam hapoh ka Jylla.

Ula kyntu ruh iaki nongshong shnong ban pynleit jingmut kham bha ha kaba iade bad ka kam rep kam riang. Ula kyntu ban pyniar shuh shuh iaka rukom rep khnang ba ka Jylla kan ym long kaba kyrduh haka liang ka bam hynrei kaba dap kyrhai ka bam na lade (Self-sufficient).

U Bah Tory Kharsyrieng Manager Axis Bank ula pynpaw ka jingkmen ban ioh iatreilang bad ka TULBA ban iarap ia kiba duk kiba suk kiba sha ktah ha kane ka jingpang khlam corona virus ne u COVID-19.