Sam symbai kba CAU R-1 ka synjuk ki nongrep ha Jowai

Syllad | The Rising MeghalayaMarch 28, 2021

Ka Myntdu Pynthorneiñ Farmers Welfare & Producer Organisation (MPFPO), kaba dei ka seng jong ki nongrep kba, rep jhur bad ki trai lyngkha ha Myntdu Pynthorneiñ haka 27 tarik une u bnai kala sam symbai kba uba kyrteng u CAU R-1.

Ka MPFPO kala sam haduh 170 Kgs u symbai kba sha ki nongrep ha katei ka pynthor.

Une u symbai kba CAU R-1 u dei uba ki nongrep kila ïoh na u Prof NB Singh ka College P.G & A.S, Umïam Ri Bhoi District Central Agriculture University, Imphal Manipur bad ïa uba la rep ha Myntdu Pynthorneiñ bad ha Mukhla naduh mynshem snem 2020 bad u dei u kba uba seisoh bha wat hapdeng ka jinghiar palat u slap ha u snem ba la dep.

Hashwa ban sam ia une u symbai kba CAU R-1, la ïoh ïa ka jingkren na u Ma KL Pariat u nongaibuit aibor bad nongprat lynti jong ka seng, uba la pynpaw ïa ka jingsngewnguh ïa ki nongrep kba nongrep jhur, kiba dei ki nongpynim ïa ka mei ramew bad kumba la paw ha kane ka jingpang COVID-19 kaba la wan mynshem snem, dei ki nongrep kiba kyrshan khaw kyrshan jhur ïa ki nongshong shnong khamtam ha ri Jaiñtia.

Yn phah saiantist ka CAU Imphal sha Jaintia ban rep ia u kba ba heh san haka shlei um

Kumjuh u kyntu jur ïa ki nongrep ba kin long kiba ïa sngewthuh jingmut, kiba ïa ryntih bad u la kyrpad ruh ïa ki khun jong ki nongrep bad ki nongrep kiba la nang ban thoh ban pule ba kin sngewbha ban mih shakhmat na ka bynta ban shim ïa ka rep kum ka kam khnang ba ki scheme rep na ki tnat rep jong ka sorkar Meghalaya bad ki tnat ka sorkar India kiba don hangne kin lah ban poi sha ki kper ki pynthor bad ba ka jingim jong ki nongrep kan pahuh pahai bad ba ki nongshong shnong ka Ri kin biang kin dap ka bam nangne na jylla la jong.

Ïa une u symbai Kba la sam da u Ma Sniawbha Shylla uba na ka shnong Khliehtyrshi uba dei u nongrep bad u trai lyngkha ha Myntdu Pynthorneiñ bad na u Ma Pyntngen Kyndait General secretary, u Ma Mehi Phawa Assistant General Secretary jong ka seng sha ki 35 ngut ki nongrep na ka shnong Khliehtyrchi, na ka shnong Mihmyntdu kiba rep ha Myntdu Pynthorneiñ bad sha ki nongrep na Mukhla bad sha ki nongrep ha Myntdu Pynthorwah.