Sam symbai kba ka synjuk ki nongrep Myntdu Pynthorneiñ

Syllad | The Rising MeghalayaApril 6, 2022

Ka Myntdu Pynthorneiñ Farmers Welfare and Producers Organization kala sam mar san ser u symbai kba CAU-R1 jong ka Central Agriculture University, Imphal, Manipur sha ki 23 ngut ki nongrep ka shnong Mukhla, West Jaintia Hills District haka sngi ba Ar.

Ïa une u symbai kba CAU-R1 uba la kam ba dei u jaitkba ba kham jwat u jyntang bad ba lah ban shah iaka jingshlei um, ki nongrep ka shnong Mukhla ki la sdang ban rep naduh u snem 2019 haki lyngkha ha Mojem bad Myntkhor ka Mukhla Raij.

Hashwa ban pdiang ïa une u symbai CAU-R1, ki nongrep ki la pynphai ïa u kba symbai trai uba ki la ïoh mar San ser (5kgs) marwei naduh mynshem snem.

U adviser ka synjuk u Khroo L Pariat ula wanrah ia une u symbai da ka jingiatreilang bad kane ka university.

Ula kyntu ïaki nongrep ban nangbteng shuh shuh ban rep da u kba symbai trai bad ban pyndonkam da ka sboh kaba ju pynmlien naduh ki longshwa manshwa khnang ba ki lyngkha ki pynthor kin bha kin miat bad pynmih shibun u kba u khaw.

La ïoh ruh ka jingkren na ka Kong Dayoo Ïakai president All Jaiñtia Muster roll Workers & Labour Union, Jowai, ka Kong Malty Suna bad u Pyntngenlang Kyndait General Secretary MPFW & PO kiba la batai ïaka rukom rep bad jingmyntoi u kba symbai CAU- R1.