Sam symbai syiar ka KVK sha ki nongri syiar ha West Jaintia Hills

Syllad | The Rising MeghalayaAugust 25, 2021

Ka KVK Jaiñtia Hills District kaba la pynlong ia ka jiingai jinghikai ri syiar kala sam da ki symbai syiar ba mar 10 tylli bad syrnod sha baroh kiba wan shah hikai ban ri syiar haka sngi Balang. Kane ka jingai jinghikai kala sdang naduh ka 20 tarik une u bnai da ka jingiatreilang bad ka Khooid ya ka Wah Myntdu bad ka Myntdu Pynthorneiñ Farmers Welfare & Producers Organization,Kine ki symbai syiar kiba la ai sha ki nongri syiar kine ki Vanaraja.

Ia kane ka jingai jinghikai la pynlong ha Bishop House, Lumbihsyntu bad ka jingthmu jong kane ka jingai jinghikai iaki samla bad rangbah kadei ban plie lad iaki samla bad rangbah ban ieng hala ki jong ki kjat da ka kam ri syiar.

Na kaliang kiba shah hikai kila ai khublei ïa u Dr D  Paswet, u ophisar ka KVK Jaiñtia Hills, Dr R. Suchiang i/c Veterinary science bad ïa u Ma Khroo L Pariat na ka bynta kane ka ka jinghikai kaba kila ioh ban kyntiew iaka kam ri syiar.

U Dr. Rimiki Suchiang uwei na ki Scientists jong ka KVK Jaintia Hills uba ai jinghikai bad uba lamkhmat ia kine ki samla bad longkmie haba ai jingkren, u la ong ba kine ki ba ioh jinghikai ki dei ban shimkhia bad ban ri bha kat kum ka jinghikai ba ki ioh khnang ba lyngba kine ki 10 tylli kin dang roi shuh shibun shah bad ba ma ki na ka liang ka KVK ruh kin dang buddien ia kane ka kam bad ba kan iai don bynta bad kine ki ba  ioh jinghikai bad ba kan dang ai shuh nangne shakhmat ia kum kine ki jait hikai.

Ka samla Selma Mary Pyngrope kawei na ki samla kaba la paw ha ha kam ri jingri syiar, kaba la sdang na kum kane kajuh ka training bad da ka jingtrei shitom ka jong ka, mynta ka la lah ban die ïa ki khun syiar sha kylleng ka Ri Jaiñtia. Ha ka jingkren ka jong ka, ka la ai bor ai mynsiem ia ki samla ba kin wan shakhmat ban shimkhia bha ia kane ka kam, bad ka la batai bniah ruh kumno ban ri ia kine ki syiar. Ka la kyntu ia kine ki ba shah ai jinghikai ba kin trei hok bad trei shitom khnang ba kin long ki briew kiba dap biang, khlem da donkam ban ap ia kita ki kam sorkar.