Sam tablet ka kong Santa Mary Shylla sha ki ASHA ha East Jaintia Hills

Syllad | The Rising MeghalayaSeptember 7, 2024

Ka MLA ka 5- Sutnga-Saipung Constituency ka Kong Santa Mary Shylla kala sam da ki Mobile Tablet sha ki nongtrei ASHA bad nongpyniaid ASHA jong ka East Jaintia Hills District ha ka prokram ba la pynlong haka 6 tarik Nailur ha Conference Hall jong ka Ophis u Deputy Commissioner (DC), East Jaintia Hills District.

Ha kane ka prokram la ia don lang ruh u DC ka EJH u Shivansh Awasthi, Additional DC Kong JU Kharpuri, Assistant Commissioner, S Malviya, District Medical and Health Officer, Dr. D Shylla, ki ophisar ka tnad ka koit ka khiah, ki ASHA bad ki nongpyniaid ASHA.

Ha ka jingkren ka Kong Santa Mary ka la pynpaw ka jingsngewnguh ia ki ASHA bad nongpyniaid ASHA ka District halor ka jingnoh synniang ba kordor jong ki sha ka koit ka khiah bad pyrto ruh ia ki sienjam ba ki la shim ban kyntiew ia ka koit ka khiah bad ka bha ka miat jong ki nongshong shnong ha ka imlang ka sahlang.

Nalor kata ka la kren ruh halor ki sienjam ba la shim da ka sorkar ban pynbiang ia ki ASHA bad ki nongpyniaid ASHA da ki Tablet khnang ban pynsuk bad pynsted ha ki jingtreikam ki jong ki da kaba pyntip ruh sha ki halor ka CM-SMS scheme.

Haba kren halor ka jingnoh synniang jong ki ASHA ban iarap ia ki kynthei ha ka por ba kha khun, ka kong Santa Mary ka la pynshlur ruh ia ki ban hikai ia ki briew ha la ki jong ki shnong ha kaba iadei bad ka jingkongsan jong ka koit ka khiah bad ban pynshlur ia ki kynthei ba kin jied ban kha khun hapoh ki jaka sumar.

Kumjuh ka khot ruh ia ki ASHA bad bad nongpyniaid ASHA ba kin pyndonkam pura ia kino kino ki lad jingiarap ba la pynioh da ka sorkar ban kyntiew ha ka liang ka koit ka khiah bad ka bha ka miat jong ki nongshong shnong ha ka Jylla hi baroh kawei.

Lah ban kdew ba ia kane ka sienjam ban sam da ki tablet sha ki nongtrei ASHA bad ki nongpyniaid ASHA ba la ialam da ka National Health Mission (NHM) la buh jingmut da ka jingthmu ban pynbha ia ki jingshakri ha ka koit ka khiah lyngba ka digital, kata halor ka jinglum jingtip bad ka jingai jingtip. Kane ka jingsam ka long kum shibynta jong ka jingpyrshang jong ka sorkar ban pyndonkam ïaka digital technology na ka bynta ka jingkoit jingkhiah kaba kham bha ha ka jylla Meghalaya.