Sam tablet ka Myntri ka tnad ka Koit ka Khiah sha ki nongtrei bad nongpyniaid ASHA

Syllad | The Rising MeghalayaAugust 13, 2024

Ka tnad ka Koit ka khiah lyngba ka National Health Mission ha ka 12 tarik Nailar ka la pynlong ia ka prokram kaba kyrpang ha Pasture Institute ha kaba la ioh ban sam a ki Tablet sha baroh ki nongtrei bad ki nongpyniaid jong ki ASHA jong baroh kawei ka Jylla lyngba ka Myntri ka tnad ka Koit ka Khiah ka Dr Ampareen Lyngdoh.

Ha kane ka prokram la ia don lang ruh u Sampath Kumar IAS Principal Secretary Health & Family Welfare, ka sorkar Meghalaya, Dr. JS Momin DHS (MCH & FW) , Dr. W Kharlukhi, DHS (R) bad kiwei pat ki ophisar bad ki staff jong ka tnad ka Koit ka khiah bad  na ka  National Health Mission,  Meghalaya.

Hapoh kane ka prokram, ka NHM Meghalaya kala ioh ban thied haduh 7084 tylli ki tablet na ka bynta ki ASHA bad 335 na ka bynta ki nongpyniaid jong ki ASHA. Kine ki tablet ki dei kiba la pyndap ia baroh ki jingdonkam jong ki ASHA ha ki jingtreikam ba man ka sngi jng ki.Ki ASHA ki donkam tang ban shu upload ia ki data ha ki apps bad ki portal katkum ka jingdonkam.

Ha ka jingkren ka Dr. M. Ampareen ka la pynkynmaw ba ka la don ka khep ha kaba ka la iakynduh bad ki ASHA ki la pynpaw ha ka shaphang ki jingeh jong ki ban ym ioh ia ka ki jingsiew ha ka por kaba biang. Haba sngap ia kane, ka la rah ia kane ka kam sha u Myntri Rangbah ka Jylla bad la shim ia ka sobjek da ka National Health Mission ha kaba ka tnad ka koit ka khiah ka la mynjur ban thied ia kine tablet na ka bynta ki ASHA bad ki nongpyniaid ASHA.

Ka la kyntu ruh  ia ki ASHA halor ka jingpyndonkam hok ia ki tablet ba la ai sha ia ki bad ki dei ban buh password ia ki tablet khnang ban iada na kano kano ka jingpyndonkam bakla bad jingduh ia ki data. Kane ka dei ka ka lad na ka bynta ki ASHA ban nang kumno ban pyndonkam hok ia kine ki tablet khnang ba kin lah ban kam ruh ia ki jingsiew jong ki lyngba ka ASHA Payment App bad ban ioh ia ki jingsiew ha ka por kaba biang.

Ka kyrmen ruh ba kin pyndonkam ia kine ki Tablet ban ai ia ki jingtip bad jingpynsngewthuh sha ki paidbah ha ka rukom kaba kham biang kum ka nuksa da kaba pyni ia ki video ba lyngkot ban iarap ban pynpoi ia ki khubor ba kongsan jong ka koit ka khiah.

Katba u Sampath Kumar IAS, ha ka jingkren u la kdew ba ka jingdon ia ki data ba la pynkylla digital ha kti ka long kaba kham bun ka jingsuk bad ka jinglong katkum ka jingstad ba mynta kan iarap ia baroh ban don ka lad ban iada ia ka teknoloji digital.

U la kdew ruh ba ka jylla Meghalaya ka dei kawei na ki jylla ba nyngkong eh ha ka ri ban pynkhreh ia ka Ka ASHA Payment App ha kaba baroh ki ASHA ki lah ban dawa ia ki jingioh jong ki lyngba kane ka app bad ynda la dep man ka por, baroh ki jingdawa lah ban ioh man la ka taiew. Ka la duna bha ka jingpynslem ban siew na ka bynta ka Ki ASHA naduh ba sdang bad pyndonkam ia ka App. Kum kata ka long ka bor jong ka jingkylla ha ka digital.  

Ha kane ka prokram ka Dr. M. Ampareen Lyngdoh kumjuh u Sampath Kumar, IAS Principal Secretary ka tnad ka koit ka khiah bad ki Director ka tnad ka koit ka khiah ki la sam ia ki tablet sha ki ASHA bad ki nongpyniaid jong ka ASHA kiba don ha kane ka jingialang.