Sam tiar iada khlam bad marbam ka Community Crisis Management Team ha Nongthymmai

Syllad | The Rising MeghalayaJune 17, 2021

Hadien ka jingwan lyngshop biang jong u corona virus lane u COVID-19 ha ka sien kaba ar (second wave) ha kaba ka Shillong kaba don ha East Khasi Hills District ka dei kaba lah shah ktah bha bad lah duh ruh ia shibun bah ki mynsiem ba kordor, hadien ba kane lah wan jia naduh u bnai Iaiong.

Dei haba shem bad iohi ia ka jingsdang ban pur sted bha jong une u khniang jingpang ka sorkar jylla kam  lah ban khlem da iaid lait da kaba pyntrei kam ia ka khangdam (total lockdown) ha baroh kawei ka district.

Dei ha kum kane ka por ba ki paidbah ki lah mad ia shibun ki jingeh jingjynjar ha kaba kiba bun ki dei kiba shu bylla myn sngi thied bam na ka bynta da miet, kiba la duh ia ka bylla sngi ka bylla ia ka jong ki.

Kumta ha u bnai ba lah dep ka UDP Nongthymmai Circle ka lah thaw ia kawei ka kynhun kaba ai kyrteng ka ‘Community Crisis Management Team’ kaba dei ka kynhun ba lah ialam hi da u Dr Jemino Mawthoh MLA barim jong ka Nongthymmai Constituency kum u Chairman ki lah mih shakhmat ha kane ka kynti kaba mynta ruh ban kner ia ki kti jingiarap sha ki paidbah ba shong ba sah ha Nongthymmai Constituency bad ha kaba nyngkong kane ka kynhun ka lah noh shwa da ki Raincoats, face masks, face shield bad ki marbam kum ki jingiarap bad ai mynsiem ruh ia ki frontline workers kiba kynthup ia ki Asha, nurses bad kumjuh ia ki doctors kiba don ha UHC Nongthymmai bad ha State dispensary Rynjah kiba lah poi sha ka 75 ngut baroh.

Kane ka kynhun ka lah leit ban noh synniang ruh sha ba bun ki shnong/dong/kyntoit kiba hap ha ka Nongthymmai Constituency da ki marbam ha kaba kot shaduh ka 600 tam ki longiing.

Ka jingthmu jong kane ka long ba  kyrpad   ia u paidbah ban ia kner lem ka kti ka jingiarap kaba long “Da u paidbah, ia u paidbah” ban pynrung ia ka jingsngew bad jingiarap para briew (Community spirit), ha kum kane ka por ki jingeh kiba bun. Ka Community Crisis Management Team kan dang iai bteng katba lah ban iarap ia ki longiing longsem kiba duk kiba jynjar.

Kane ka long kat kum u kytrwoh ba la phah da Desmond Mawlong Gen Secy, UDP Nongthymmai Circle