Sam tiar iarap ka Ephphatha Society sha ki briew ba don jingduna haka bor met, pynbna ban sdang sa iaka shlem ai jinghikai

Syllad | The Rising MeghalayaDecember 5, 2021

Ka Ephphatha Society ka seng kaba peit iaka bha ka miat ki briew kiba don jingduna haka bor met kala iarap pynioh iaki dieng kjat (crutches) bad ki wheelchairs sha ki 13 ngut bad ka ne ka society kala pynbna ruh ba kan sdang sa iaka Vocational Training Centre ha East Jaintia Hills Distirct ban kyrshan ia ki briew kiba kyrpang bad kiba donkam jingiarap.

Ia kine ki tiar kala aiti haka 2 tarik une u bnai, ka sngi rakhe iaka jingseng nongrim ne ka foundation day jong kane ka society kaba long ha Ieng Swer Memorial Secondary School, Dkhiah West, East Jaintia Hills District .

U Myntri sorkar uba long ruh u MLA Khliehriat, u Kyrmen Shylla ula long kum u kongsan haka jingiadonlang ka samla Bertina Lyngdoh kaba la ioh iaka kyrdan ba nyngkong eh napdeng kiba duna ha ki dkhot met napoh ka jylla Meghalaya.

Kiwei kiba iadonlang ki kynthup ia u Rev. ES Sapuh president Ephphatha Society, S Phawa secretary Ephphatha Society, SS Syiemlieh I/c Deputy Commissioner EJH, Kong R Passah District Social Welfare Officer, T. Kyndiah CDPO, F Dhar President Kyrmen Foundation nalor ki kmie ki kpa jong ki 42 ngut kiba don jingduna PwD bad ki nongialam shnong.

Ha kane ka sngi la pyllait paidbah ruh ia ka kot Khasi ba nyngkong eh na ka bynta kiba duna ha ki dkhot met kaba kyrteng “Jingshai na Ephphatha” ia kaba la thoh da ki 7ngut ki nongthoh.

La ai ti iaki 7 tylli ki wheelchair, 6 tylli ki kjat dieng ne crutches kiba la ai da ka State Resource Centre Shillong (SRC) bad ia ki 30 tylli ki Blanket kiba la thied da ka society na ka bynta ki PwDs.