Sam tiar misteri u Lahkmen sha ki 90 ngut kiba la dep pyntbit ha Amlarem

Syllad | The Rising MeghalayaOctober 1, 2024

U MLA ka thain bad Chief Adviser ka sorkar Jylla Bah Lahkmen Rymbui haka 30 tarik Nailur ula sam syrnod bad tiar sdang trei kiba tip kum ki startup tools sha ki 90 ngut ki samla bad rangbah ka Block Amlarem kiba la pyndep iaka jingshah hikai pyntbit haka sap misteri.

Kane ka jingai jinghikai pyntbeit ka dei kaba la tip kum ka Rural Masonry Program kaba la neh 3 bnai lynter ba la pynlong da ka Jaintia Institute of Technology (JIT) bad la kyrshan da ka Meghalaya State Skills Development Society (MSSDS).

Iaka jingialang sam syrnod la pynlong ha Amlarem C&RD Block ba la pyniaid da u Bah B. Marwein, Director Jaintia Institute of Technology, Jowai.

La ioh ka jingkren lyngkot na u Block Development Officer (BDO), Amlarem Bah G. Mylliem bad na u Skill Development Officer MSSDS Bah Lambormi Suchen.

Kine ki 90 kynthup 60 ngut na Nongtalang bad 30 ngut na Darrang kin trei haka skhim Pradhan Mantri Awas Yojana (PMAY) na ka bynta ban shna iaki iing ba duk hapoh ka shnong Darrang bad Nongtalang.

U Bah Lahkmen Rymbui haka jingkren ula ong, ka Meghalaya Skills Development Society kadei kawei na ki atiar kaba pynkup bor iaki nongshong shnong jong ka Jylla na ka bynta ba kin lah ban ieng hala ki jong ki kjat.

U kyrmen ruh ba lyngba ka jingioh ia kum kine ki jait jinghikai kan iarap pynduna iaka jingbun ki nongbylla bar jylla hapoh ka Jylla khamtam ruh kan pynim bad kyntiew iaka ioh ka kot ka jong ki.

Ioh iing skul thymmai ka Pdengkarong Govt LP Skul