Sam u CM Conrad shithi thungkam sha ki nonghikai LP, pyllait ruh iaki tiar TLM

Syllad | The Rising MeghalayaFebruary 6, 2024

U Myntri Rangbah ka jylla Conrad K Sangma haka 6 tarik Rymphang ula sam iaki shthi thungkam (appointment letters) sha ki 346 ngut ki nonghikai skul  LP khaka jingialang kaba long ha State Convention Centre Shillong haka jingiadonlang u Myntri ka tnad pule puthi u Rakkam A Sangma.

Ha ka jingkren ha kane ka sngi na ka liang u Myntri Rangbah u la ong, ba kane ka program kaba la pynlong mynta ka sngi kam shym dei satia tang halor kane ka nongrim jong ka jingsam kine ki shithi thungkam sha ki nonghikai kiba ïoh rungkam thymmai, hynrei ka dei ruh ka program ba lah ban ïasam lang halor ka jingīohi jngai bad ka jingangnud jong ka sorkar jylla. “Ngi donlang ha kajuh ka kynhun mynta, ngi lah ban ïapher halor ki jingtrei la ki jong ki jong ki kam bad hala ki jong ki jong ki kyrdan hynrei ngi don hangne ba lah ban poi bad kynjoh lang sha kajuh ka thong ban rah ïa ka jylla sha ka kyrdan ba kham kynjang,” la ong u Myntri Rangbah. U la ong ruh ba ka jingtheh pisa haka longbriew manbriew ka dei kawei na ki jingbei kaba heh tam. “Na ka bynta ki jylla kiba dang don ha ka jingïaksaid ban poi sha ka thong ka jingbei ha ki bynta kiba dei kata ha kaba ïadei bad ka jingtei ïa ka longbriew manbriew ka long kaba donkam bha khnang ba lah ban pynmih ki briew kiba kynsai ba lah pat ban poi sha ka thong bad dei halor kane ba ngi trei ha ki lyngkha kiba lah thikna,” la bynrap u Myntri Rangbah.

Hadien kane u Myntri Rangbah u la kyntu ïa kine ki nonghikai kiba shah jied thymmai ba kin sdang ïa ka kam jong ki da ka jingmut kaba bha ba kum ki nonghikai ym tang ba kin ai jinghikai ha ka pule dangle hynrei ha kajuh ka por ruh ki donkam ban saiñdur ïa ka jingim u khynnah hapoh ka jingpeit bad jingkhmih jong ki. U la ong ruh katba ka sorkar ka dang theh iaki jingiarap na ka bynta ka jingpynjanai ki jingtei ha ki shnat ai jinghikai hynrei ki jingai ai jinghikai ki hap ha ka lyngkor jong ki, ka ban saiñdur kylla halor ka jingtei ïa ka bha ka miat jong ka lawei ka jylla bad ka Ri hi baroh kawei bad ki nonghikai ki long napdeng kito ki  lah ban shibun  ka jingkylla.

Ha kawei pat ka liang ha ka jingkren jong Myntri k tnad pule puthi u Rakkam A Sangma, u la ong ba ka kam hikai ka long kawei na ki kam kaba donburom tam bad u la kyntu “hapdeng ba phi trei ïa kane ka kam phi dei ban ai ka jingshakri jong ka jingaiti bad lenlade namar dei haphi ka bor ka shong ba lah ban wanrah ka jingkylla kumta ngi phah ïaphi ryngkat ka jingskhem jingmut ba phin lah ban tyngrong lem ïa ka jingkit ba ban khia jong ka sorkar.”  Na ka liang une u Myntri ula maham ruh iaki nonghikai ba ai bylla iaka kam ha kiwei pat ki nonghikai namar kane ka ktah halor ka pule puthi u khynnah bad pynsynjor ruh halor ka jinghikai kaba thikna.

Ha kane ka sngi ka lah don ruh ka jingsam ïa ki tiar ai jinghikai ba la tip kum ki Jadui Pitara na ka bynta ki khynnah kiba dang shu sdang leitskul. Haduh 35,000 ngut ki khynnah kin sa ïoh kine ki tiar lyngba ki nonghikai LP marsien sdang skul. Kine ki tiar kiba kynthup naduh ki activity sheet, worksheet, ki poster, bad ki jinglehkai ki dei kiba lah ban ïarap ïa ki khynnah ha ka jingpule jong ki ha baroh shisnem lynter.